İQTİSADİYYAT


Azərbaycanla Yaponiyanın iqtisadi əməkdaşlığının perspektivləri müzakirə edilib

Tokio, 17 sentyabr, AZƏRTAC

Azərbaycanın Ekologiya və Təbii Sərvətlər naziri Muxtar Babayev Yaponiya-Azərbaycan İqtisadi Komissiyasının sədri, “Itochu” korporasiyasının icraçı direktoru, “Enerji və Kimyəvi Məhsullar” şirkətinin prezidenti Keita İşii ilə iki ölkə arşında iqtisadi əməkdaşlığın perspektivlərini müzakirə edib.

AZƏRTAC xəbər verir ki, videokonfrans formatında keçirilən görüşün məqsədi 2019-cu ilin noyabrında Tokioda keçirilmiş Azərbaycan ilə Yaponiya arasında iqtisadi əməkdaşlıq üzrə Dövlət Komissiyasının və Yaponiya-Azərbaycan İqtisadi Komitəsinin 10-cu birgə iclasından ötən müddət ərzində görülmüş işlər, həlli tələb olunan məsələlər, eləcə də qarşıdakı dövr üçün əməkdaşlığın genişləndirilməsi barədə müzakirələrin aparılması olub.

Onlayn görüşdə Azərbaycanın Yaponiyadakı səfiri Gürsel İsmayılzadə və “Itochu” şirkətinin nümayəndələri iştirak ediblər.

Nazir M.Babayev iki dost ölkə arasında iqtisadi əməkdaşlığın inkişafı üçün böyük potensialın mövcudluğunu nəzərə alaraq ticarət dövriyyəsinin daha da artırılmasının əsas istiqamətlərdən birini təşkil etdiyini diqqətə çatdırıb. Yaponiya ilə enerji, nəqliyyat, telekommunikasiya, sənaye, kənd təsərrüfatı, elm, təhsil, mədəniyyət, turizm və ətraf mühit sahələrində əməkdaşlıq əlaqələrinin genişləndirilməsinə böyük önəm verildiyini vurğulayıb.

K.İşii öz növbəsində Yaponiya şirkətlərinin Azərbaycanın enerji sektorunda və ölkəmizdə həyata keçirilən infrastruktur layihələrində fəal iştirakını xatırladıb.

İclasda ənənəvi əməkdaşlıq sahələri ilə yanaşı, su ehtiyatlarından səmərəli istifadə, alternativ və bərpaolunan enerji mənbələri, digər qarşılıqlı maraq doğuran sahələrdə əməkdaşlığın yaradılması məsələləri də müzakirə edilib.

Qeyd olunub ki, hazırda iqlim dəyişmələri nəticəsində yaranan quraqlıq, su çatışmazlığı kimi problemlərin həlli istiqamətində ikitərəfli əməkdaşlığın qurulması hər iki tərəf üçün faydalı ola bilər. Bu sahədə ölkəmizdə hazırda nəzərdə tutulan layihələr barədə məlumat verilib. Su resurslarının davamlı idarə edilməsi, müasir su təchizatı və paylama şəbəkəsinin qurulmasında, eləcə də dəniz suyunun duzsuzlaşdırılması və məişət tullantı sularının təmizlənməsi sahəsində Yaponiya təcrübəsinin öyrənilməsinin vacibliyi qeyd edilib.

Yaponiyanın Azərbaycanı təhsil, sosial, mədəniyyət və digər layihələr vasitəsilə hər zaman dəstəklədiyi xatırladılıb və belə layihələrin bundan sonra davam etdirilməsinin önəmi vurğulanıb.

K.İşii irəli sürülən təşəbbüslərin Yaponiya tərəfi üçün də maraqlı olduğunu, qeyd olunan sahələrdə əməkdaşlığa hazır olduqlarını bildirib.

Görüşün sonunda COVID-19 pandemiya şəraiti nəzərə alınaraq bundan sonra görüşlərin rübdə bir dəfə onlayn formatda keçirilməsi, bu iclaslarda digər dövlət və özəl qurumların nümayəndələrinin iştirakının təmin edilməsi barədə razılıq əldə edilib.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.