CƏMİYYƏT


Azərbaycanlı alim Rusiyada onkoloji xəstəliklərin yeni müalicə metodunu təklif edir

Moskva, 13 may, AZƏRTAC

Azərbaycanlı alim Namiq Hüseynzadənin müəllifi olduğu elmi tədqiqat nəticəsində Rusiya Elmlər Akademiyası A.M.Proxorov adına Ümumi Fizika İnstitutu və N.İ.Piroqov adına Rusiya Milli Tədqiqat Tibb Universitetinin mütəxəssisləri onkoloji xəstəliklərin soyuq plazma ilə müalicəsi metodunu işləyib hazırlayıblar.

AZƏRTAC xəbər verir ki, alimlər 20-dən çox xərçəng növünün kimyaterapiya ilə eyni vaxtda tətbiq edilən soyuq plazma vasitəsilə müalicəsini təklif edirlər. Elmi tədqiqatın müəllifi A.M.Proxorov adına Ümumi Fizika İnstitutunun şöbə müdiri, N.İ.Piroqov adına Rusiya Milli Tədqiqat Tibb Universitetinin kafedra müdiri, fizika-riyaziyyat elmləri doktoru, professor Namiq Hüseynzadədir.

Plazma ilə müalicə təbabətlə fizika sahəsində yeni nailiyyətlərin vəhdətini nəzərdə tutur. Soyuq plazma tərkibində aktiv radikallar olan ionlaşdırılmış qazdan ibarətdir. Soyuq plazmadan yaraların müalicəsi və sterilləşdirilməsi üçün artıq istifadə olunur.

Namiq Hüseynzadənin sözlərinə görə, soyuq plazma kimyaterapiyanın zəhərliliyini azaldır, xərçəng hüceyrələrinə birbaşa təsiri artırır. Alimlər 2021-ci ildə metodun heyvanlar üzərində sınaqdan keçirilməsini başa çatdıraraq, tədqiqatın nəticələrini təqdim edəcəklər.

Fəridə Abdullayeva

AZƏRTAC-ın xüsusi müxbiri

Moskva

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.