SİYASƏT


Azərbaycanlı deputat AŞPA-da Qərbin müsəlman Şərqinə saxta demokratiya ixracının yaratdığı faciələr məsələsini qaldırdı

Strasburq, 9 aprel, AZƏRTAC

Avropa Şurası Parlament Assambleyasının (AŞPA) hər sessiyasında olduğu kimi, bu dəfə də baş katib Torbyorn Yaqlandın ənənəvi sual-cavab saatı keçirildi. Bir saat davam edən bu müzakirədə AŞPA-dakı siyasi qrupların və ayrı-ayrı deputatların qitədə və dünyada cərəyan edən proseslərlə bağlı mühüm sualları cavablandırıldı.

AZƏRTAC xəbər verir ki, Azərbaycanın AŞPA-dakı daimi nümayəndə heyətinin üzvü Rafael Hüseynov da Avropa Şurasının baş katibinə Şərq və Qərb münasibətləri, demokratiya ixracı pərdəsi altında ayrı-ayrı ölkələrə qarşı yürüdülən dağıdıcı siyasətlə bağlı sual ünvanladı. Müsəlman Şərqinin qədim intibah məskəni olan ölkələrində bu gedişatda baş verən dağıntılar, yaranmış nəhəng qaçqınlar ordusunun və baş vermiş faciələrdən törəyən digər fəsadların dünyaya, konkret olaraq Avropaya birbaşa mənfi təsirlərinə diqqət yönəldən deputat Rafael Hüseynov dedi: “Qərbin müsəlman Şərqinə son illərdəki psevdodemokratiya ixracı cəhdləri acı nəticələr verdi. Dünya daha demokratik olmaq əvəzinə milyonlarla yeni qaçqınlar ordusunu əldə etdi, müvazinətini itirən, dağılan, qədim sivilizasiya inciləri məhv olan İraqı, Liviyanı, Suriyanı, Misiri qazandı. İndi Qərbin yeni çağırışları bu dağıdıcı dalğaları İrana, Səudiyyə Ərəbistanına yönəltmək niyyətlərindən xəbər verir. Sözdə tez-tez dinlər, sivilizasiyalararası dialoqdan danışsaq da, belə proseslərlə dünyanı daha artıq parçalamaq, çıxılmaz böhranlara düçar etmək, zəncirvari fəlakətlər yuvasına çevirməkdə olduğumuzu görmürükmü?

Axı, reallıq da aşkar nümayiş etdirir ki, bütün bu proseslərin mütləq iki başı var, axı, hamımız bu qlobal tələdəyik, axı, bütün dünya təhlükə altındadır!

Böyük faciələrə aparan bu qorxulu proseslərin qarşısını almaqdan ötrü Avropa Şurasının da məsuliyyəti böyükdür. Nə vaxta qədər biz qabaqlayıcı tədbirlər görmək əvəzinə baş vermiş fəlakətlərin nəticələrini təhlil etməklə məşğul olacağıq?”.

Rafael Hüseynovun sualını cavablandıran T.Yaqland qaldırılan problem və azərbaycanlı deputatın mövqeyi ilə tam şərik olduğunu bildirərək dedi: “Cənab Hüseynovun qaldırdığı məsələ çox vacibdir. Belə həssas məsələlərdə son dərəcə ehtiyatlı olmaq lazımdır. Biz şahidi olduq ki, demokratiyanı guya ixrac etməkdən ibarət bu biznes nə kimi fəlakətlərə bais olur. Kənardan gələn saxta demokratiya qəbuledilməzdir. Bunun bir sıra ölkələri hansı faciələrə gətirib çıxardığı göz qabağındadır. Tunisin nümunəsi göstərdi ki, belə proseslər ölkənin öz içərisindən zəruri ehtiyac kimi yetişəndə nəticələri də daha məqbul olur. İndi xüsusi institutlar var ki, demokratik proseslərin məhz belə irəliləməsi üçün kömək göstərirlər. Baş vermiş siyasi fəlakətlərin sadaladığınız ölkələrdə bütün başqa ağır nəticələrindən əlavə qədim intibahın nadir nümunələrinə vurduğu zərbələr xüsusi bir mövzudur”.

Fikirlərinə yekun vuran baş katib bu qəbil mühüm problemlərin daim Avropa Şurasının da diqqətində saxlanılmasının əhəmiyyətini vurğuladı.

Şəhla Ağalarova

AZƏRTAC-ın xüsusi müxbiri

Strasburq

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.