İQTİSADİYYAT


“Azərenerji” “Şəki” elektrik stansiyasının “itirilmiş” gücünü bərpa edib

Bakı, 13 yanvar, AZƏRTAC

“Azərenerji” ASC “Reabilitasiya Proqramı” çərçivəsində digər elektrik stansiyalarında olduğu kimi, “Şəki” elektrik stansiyasında da “itirilmiş” gücün bərpa edilməsi istiqamətində təmir-bərpa işləri həyata keçirib.

ASC-dən AZƏRTAC-a bildiriblər ki, 2018-ci ilin payızında qəbul edilən “Reabilitasiya Proqramı”na qədər “Şəki” elektrik stansiyasında mövcud 10 aqreqatdan 2 ədədinin korpusu dağıldığından ümumiyyətlə işləmirdi, qalan 8 aqreqat isə kəsirlə fəaliyyət göstərirdi. Daha doğrusu “Şəki” elektrik stansiyasının qoyuluş gücü 87 meqavat olsa da, cəmi 40 meqavat güclə və tez-tez dayanmalar olmaqla işləyirdi. Korpusu dağılan 2 aqreqat da daxil olmaqla 10 aqreqatda təmir işləri aparılıb, ehtiyat hissələri dəyişdirildikdən sonra, indi stansiya 80 meqavatdan artıq güclə işləyir. Stansiyada 50 faiz və ya 40 meqavat “itirilmiş” güc bərpa edilməklə yanaşı, etibarlıq və dayanıqlıq təmin olunub.

Qeyd edək ki, “Azərenerji” ASC “Şəki” elektrik stansiyası ilə yanaşı, ümumilikdə 6 ədəd modul tipli elektrik stansiyası da daxil olmaqla, 12 elektrik stansiyasında “itirilmiş” gücün bərpa edilməsi istiqamətində yenidənqurma və təmir işləri aparır. Bu günə qədər ümumilikdə 485 meqavat “itirilmiş” güc bərpa edilib.

2018-2021-ci illəri əhatə edən “Reabilitasiya proqramı” çərçivəsində ümumilikdə 1000 meqavatadək “itirilmiş” gücün bərpa edilməsi nəzərdə tutulub.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.