İQTİSADİYYAT


“Azəriqaz”: Ölkə üzrə istixana sahəsində fəaliyyət göstərən sahibkarların ödənişləri 90 faizə çatır

Bakı, 14 oktyabr, AZƏRTAC

Respublika üzrə istixana sahəsində fəaliyyət göstərən sahibkarların ödənişləri 89 faizə bərabərdir.

“Azəriqaz” İstehsalat Birliyindən AZƏRTAC-a bildirilib ki, cari il üzrə istixana fəaliyyəti ilə məşğul olan sahibkarlar növbəti isitmə mövsümü yaxınlaşdıqca borclarının ödənilməsini həyata keçirirlər. Ölkədə sahibkarlığın inkişafına “Azəriqaz” da daim dəstək göstərir və pandemiya dövründə yaranmış borcların ödənilməsi üçün bütün mümkün şərait təmin olunur. Belə ki, debitor borcun ödənilməsi haqqında “Razılaşma protokolu” tərtib olunaraq cari istehlakla bərabər ötən isitmə mövsümü ərzində yaranmış borcun hissə-hissə ödənilməsinə imkan yaradılır. Bu kimi qarşılıqlı anlaşma üçün müraciət edən sahibkarların sayı da getdikcə artmaqdadır.

Qeyd edək ki, borcların ödənilməsi üzrə ən çox problemli hallarla rastlaşılan Şəmkir Regional Qaz İstismarı İdarəsinin xidmət sahəsinə daxil olan rayonlarda fəaliyyət göstərən istixana sahibləri oktyabr ayının 1-nə olan məlumata görə, ümumilikdə 9 milyon manata yaxın borcdan təqribən 800 min manata yaxın olan məbləğin ödənilməsini təmin ediblər. Bu da qısa vaxt üçün, yəni “Azəriqaz” İstehsalat Birliyinin təqribən bir ay bundan öncə onlara etdiyi müraciətdən sonra normal göstəricidir. Hətta onların arasında 248 min, 213 min manatlıq borcunu tam ödəyənlər də var. Digərləri isə borclarının bir qismini (98 min, 58 min, 95 min manat və sair məbləğdə) ödəməklə yerdə qalan məbləğin digər hissəsinin “Razılaşma protokolu” tərtib olunmaqla 2020-ci il dekabr ayının birinədək hissə-hissə ödənilməsinə dair öhdəlik götürüblər. Həm borcunu tam, həm də hissə-hissə ödəyən istixana sahiblərinin təsərrüfatlarına qaz açılışı tam təmin edilməkdədir.

Əlavə edək ki, hazırda Bakı Regional Qaz İstismarı Departamentinin xidməti ərazisində fəaliyyət göstərən 227 istixana sahibkarlıq subyektinin istifadə edilən qaza görə ödənişləri 94,6 faiz təşkil edir. Şəmkir Regional qaz istismarı İdarəsinin xidməti ərazisində fəaliyyət göstərən 210 istixana sahibkarlıq subyektinin ödənişləri 73,9 faiz təşkil edir. Salyan Regional qaz istismarı İdarəsinin xidməti ərazisində fəaliyyət göstərən 254 istixana sahibkarlıq subyektinin ödənişləri 92,7 faizdir. Ümumilikdə, respublika üzrə istixana sahəsində fəaliyyət göstərən sahibkarların ödənişləri 89 faizə bərabərdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.