İQTİSADİYYAT


“Azərsu” sovet dövründə tikilmiş 430 yaşayış binasını sayğaclaşdırır

Bakı, 20 oktyabr, AZƏRTAC

“Azərsu” ASC sovet dövründə tikilmiş 430 yaşayış binasını sayğaclaşdırır.

ASC-dən AZƏRTAC-a bildirilib ki, çoxmənzilli yaşayış binalarının daxili su təchizatı sistemlərinin yenidən qurulması məqsədilə “Azərsu” tərəfindən yeni layihənin icrasına başlanılıb. Hazırda Bakı və Sumqayıt şəhərlərində, həmçinin ətraf qəsəbələrdə icra olunan layihə çərçivəsində binaların daxilində yerləşən dik dayaqlar ləğv edilərək pilləkən qəfəsələrinə çıxarılır, hər bir abonent sayğacla təmin olunur.

İstehlakçıların suölçən cihazlarla təmin edilməsi məqsədilə həyata keçirilən layihə Bakı şəhərinin Səbail, Nəsimi, Yasamal, Binəqədi, Nərimanov, Xətai və Qaradağ rayonlarında, həmçinin Sumqayıt şəhəri və Abşeron rayonunda sovet dövründə tikilmiş 430 yaşayış binasını və bəzi ərazilərdə fərdi yaşayış evlərini əhatə edir. Bu məqsədlə mənzillərdə və fərdi yaşayış evlərində 28 minədək sayğacın quraşdırılması nəzərdə tutulur. İcrasına cari ilin sentyabr ayında başlanmış layihə çərçivəsində artıq 3 mindən çox sayğac quraşdırılıb.

Təsdiqlənmiş layihəyə uyğun olaraq podratçı şirkətlər tərəfindən yeni çəkilmiş su xətləri mənzillərin daxilində mövcud sistemlərə birləşdirilir. Bəzi hallarda vətəndaşlar mənzillərin daxilində layihədə nəzərdə tutulmayan əlavə su xətlərinin çəkilməsi və ya digər işlərin görülməsini tələb edirlər. Belə olan halda vətəndaşlar həmin işləri podratçı təşkilatla qarşılıqlı razılaşma əsasında öz vəsaiti hesabına və ya kənardan usta cəlb etməklə həyata keçirə bilər. Mənzilin daxilində layihədə nəzərdə tutulmayan işlərin görülməsinə və vəsaitin ödənilməsinə görə “Azərsu” heç bir məsuliyyət daşımır.

Yeni xətlərin çəkilməsi, sayğacların quraşdırılması və layihəyə uyğun olaraq mənzildaxili birləşmələrin görülməsinə görə abonentlərdən hər hansı ödəniş tələb olunmur. Vətəndaşlar belə hallarla qarşılaşarsa bu barədə ASC-nin “955” Zəng Mərkəzinə müraciət etmələri xahiş olunur.

Qeyd edək ki, sovet dövründə tikilmiş binaların əksəriyyətində daxili su təchizatı sistemləri şaxtalarda quraşdırılıb. Dik dayaqlar uzun müddət istismar olunduğundan bəzi hallarda su sızmaları və axıntılar baş verir. Bu da mənzillərin və zirzəmilərin su ilə dolmasına səbəb olur. Binadaxili su təchizatı sistemlərinin şaxtalardan pilləkən qəfəsələrinə çıxarılması ilə su axıntılarının qarşısını alınacaq, eyni zamanda, su xətlərinin istismarı və sayğacların oxunması asanlaşmaqla xidmətin keyfiyyətinin yüksəldilməsinə imkan verəcək. Hər bir mənzildə sayğacların quraşdırılması və sayğacların pilləkən qəfəsələrinə çıxarılması dəqiq uçotun aparılması, yaranmış borcların vaxtında toplanması və debitor borcların yaranmamasına gətirib çıxaracaq.

2013-cü ildən binadaxili su təchizatı sistemləri “Azərsu”nun balansına verilib. Ötən dövrdə dövlət investisiyaları hesabına Abşeron yarımadası və regionlarda 6000-dən artıq çoxmənzilli yaşayış binasının daxili su təchizatı sistemləri yenidən qurulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.