AZƏRTAC xəbər verir ki, noyabrın 24-də Bakı şəhərinin 7 rayonunda əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq, əsasən meyvə, bostan və tərəvəz məhsulları çıxarılmışdı.

“Təzə bazar” MMC-nin həyətindəki yarmarkada paytaxt sakinlərinə Sabirabad, Salyan, Gədəbəy, Tovuz, Hacıqabul və digər rayonlardan gətirilmiş geniş çeşiddə kənd təsərrüfatı məhsulları təklif olunurdu.

Sabirabad Rayon İcra Hakimiyyəti başçısının müavini Eydar Yaqubov bildirdi ki, Prezident İlham Əliyevin tapşırığı ilə rayonumuzda xeyli iş görülməsi ilə yanaşı, hər həftə yarmarkaya təzə və keyfiyyətli məhsullar da göndərilir. Havaların soyumasına, yağmurlu keçməsinə baxamayaraq, yarmarkada bolluqdur, alıcılar da qiymətlərdən razıdırlar. Şənbə və bazar günləri nümayəndələrimiz burada vəziyyətə nəzarət edirlər. Nəsimi Rayon İcra Hakimiyyəti və bazarın rəhbərliyi fermerlər üçün münasib şərait yaradıblar. Gələn həftə satışa daha çox məhsul çıxaracağıq.

Kənd Təsərrüfatı Nazirliyi mətbuat xidmətinin rəhbəri Murtuzəli Hacıyevin verdiyi məlumata görə, şənbə günü burada paytaxt sakinlərinə 20,3 ton məhsul, o cümlədən 3 ton ət, 0,3 ton ağartı, 6 ton tərəvəz, 4 ton kartof, 7 ton meyvə, 12 min ədəd yumurta təklif olunmuşdur.

A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada satışa Salyan, Qusar, Dəvəçi, Astara və digər rayonlardan 17 ton tərəvəz, 26 ton meyvə, 2 ton ət, 5 ton kartof, ümumilikdə 52 tondan çox müxtəlif çeşidli kənd təsərrüfatı məhsulları çıxarılmışdı.

Qubalı Fazil Kərimov ilk dəfədir ki, yarmarkaya gəlmişdir və gətirdiyi 2 tondan çox almanın satışı üçün yaradılmış şəraitdən razılıq edir.

Yarmarkada kartofun kiloqramı 40-60, soğan 25-30, kələm 20, nar 40-80, alma 20-30 qəpiyə təklif edilirdi.

Əraziyə nəzarət edən Kənd Təsərrüfatı Nazirliyinin nümayəndələri bildirdilər ki, havanın yağmurlu olmasına baxmayaraq, gətirilmiş məhsullar lazımi qaydada yerləşdirilmiş və alıcıların sərbəst alış-verişi üçün hər cür şərait yaradılmışdır. Məhsulların qiyməti bazardakından 40-50 faiz ucuzdur.

Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada Saatlı, Salyan, Ağdaş, Masallı və digər rayonlardan 16 tona yaxın məhsul gətirilmişdi.

Kartof, soğan, lobya satan ağdaşlı Ramiz Şirməmmədovun sözlərinə görə, bir ildən çoxdur ki, hər həftə yarmarkaya məhsul gətirir. Fermer indiyə qədər burada 15 tondan artıq tərəvəz satmışdır.

Alıcılar məhsul bolluğundan, keyfiyyətdən və qiymətlərdən razılıq edirdilər.

Suraxanıda “Günəş” ticarət mərkəzindəki yarmarkada Qobustan, Balakən, Samux, Daşkəsən, Cəlilabad, Salyan və Biləsuvar rayonlarının fermərləri satışa 55 tondan çox məhsul çıxarmışdılar.

Kənd Təsərrüfatı Nazirliyinin nümayəndəsi Mustafa Rüstəmov dedi ki, məhsulların qiymətləri bazardakından 25-30 faiz ucuzdur.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə cəlilabadlı fermerlər satışa 5 tondan çox məhsul çıxarmışdılar. Kənd Təsərrüfatı Nazirliyinin təmsilçisi Səfəralı Nəsirovun sözlərinə görə, qiymətlərin bazardakından 20-25 faiz ucuz olduğu yarmarkada heyvanlar baytar nəzarəti altında kəsilir və əhaliyə təklif olunur.

Metronun “Əhmədli” stansiyasının yaxınlığında, Sarayevo küçəsində, “Bakı” kiçik müəssisəsinin “Azər” ticarət mərkəzindəki yarmarkada Salyan, Kürdəmir, Quba, Şəmkir, Ağcabədi. Qax, Biləsuvar, Qəbələ və Şəki rayonlarından gətirilmiş geniş çeşiddə kənd təsərrüfatı məhsulları satılırdı. Şəmkir və Kürdəmir rayonlarının fermerləri alıcılara daha çox meyvə-tərəvəz təklif edirdilər.

Kənd Təsərrüfatı Nazirliyinin nümayəndəsi Rafiq Nəcəfov dedi ki, bu gün satışa 225, 5 ton ton kənd təsərrüfatı məhsulu çıxarılmışdır.

Yarmarkada alma, nar, kartof, kələm çoxluq təşkil edirdi. Kələmin kiloqramı 20, alma 40 qəpiyə satılırdı. Paytaxt sakinləri bazardakından xeyli ucuz olan məhsulları həvəslə alırdılar.

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkaya fermerlər 3 ton kələm, 6 ton kartof, 4 ton soğan və digər kənd təsərrüfatı məhsulları çıxarmışdılar. Bu məhsullar şəhər sakinlərinə bazardakından 20-30 faiz ucuz qiymətlərə təklif olunurdu.

Kənd Təsərrüfatı Nazirliyinin nümayəndəsi Qalib Hacızadə dedi ki, bu gün Qazax və Ağsu rayonlarından yarmarkaya 24 tondan artıq müxtəlif çeşiddə meyvə-tərəvəz və heyvandarlıq məhsulları gətirilmişdir. Nahar fasiləsinədək onların 40-50 faizi satılmışdır.

Alıcılar onlara təklif edilən məhsulların həm təzə, həm də keyfiyyətli olduğunu bildirirdilər.

Binəqədi rayonunun 6 nömrəli Bakı Texniki Peşə liseyinin qarşısında təşkil olunmuş yarmarkada da kənd təsərrüfatı məhsulları ucuz qiymətlərə satılırdı. Satışa Bərdə, Ağstafa və Goranboy rayonlarından gətirilmiş 25 ton meyvə-tərəvəz və süd məhsulları çıxarılmışdı.

Nərimanov rayonundakı Keşlə ticarət mərkəzində təşkil olunmuş yarmarkada Xaçmaz, İmişli, Tovuz, Astara, Salyan, Neftçala, Oğuz, Qobustan və Tərtər fermerləri müxtəlif çeşidlərdə 98,53 ton meyvə-tərəvəz təklif edirdilər.

Astaranın Ucakərən kəndindəki “İsmət” fermer təsərrüfatının rəhbəri Valeh Zülfüqarov növbəti yarmarkaya 2 dəfə çox sitrus meyvəsi gətirəcəyini söylədi.

Kənd Təsərrüfatı Nazirliyinin nümayəndəsi Fərhad Eminov bildirmişdir ki, havanın kəskin dəyişməsi yarmarkada alverin ahənginə təsir etməmişdir.