AZƏRTAC xəbər verir ki, fevralın 10-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.

Suraxanıda “Günəş” ticarət mərkəzindəki yarmarkada Qobustan, Samux, Daşkəsən, Quba və Biləsuvar rayonlarının fermərləri satışa 23 ton məhsul çıxarmışdılar. Satılan məhsulların qiymətləri bazardakından 25-30 faizə qədər ucuz idi. Alıcılar məhsulun qiymətindən və keyfiyyətindən razılıq edirdilər.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad və Göyçay rayonunun fermerləri alıcılara 4 ton məhsul təklif edirdilər.

Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində Salyan, Kürdəmir, Quba, Ağcabədi, Qax, Biləsuvar və Qəbələ rayonlarının fermerləri meyvə-tərəvəz, bostan bitkiləri, konserv məhsulları, ət və ağartı satırdılar.

İşçi qrupunun qərargahından verilən məlumata görə, şənbə və bazar günləri burada ümumilikdə 109,1 ton məhsul, o cümlədən 16 ton kartof, 25,8 ton tərəvəz, 11 ton ət, 1,5 ton ağartı və digər kənd təsərrüfatı məhsulları satılmışdır.

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısında təşkil olunmuş yarmarkada Qazax və Ağsu rayonlarının fermerləri şəhər sakinlərinə ucuz qiymətlərə kələm, çuğundur, alma, nar, kartof, kök və digər kənd təsərrüfatı məhsulları təklif edirdilər.

Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, şənbə və bazar günləri yarmarkaya 27,7 ton məhsul gətirilmişdi.

Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada da qiymətləri bazardakından 20-30 faiz ucuz olan müxtəlif çeşiddə meyvə-tərəvəz və heyvandarlıq məhsulları satılırdı. Burada süd məhsullarının alıcıları daha çox idi.

İşçi qrupunun rəhbəri Sabir Əhədov bildirmişdir ki, Goranboy, Bərdə və Ağstafa fermerləri satışa 23 tondan çox məhsul çıxarmışdılar.

Nərimanov rayonu, Keşlə ticarət mərkəzində təşkil olunmuş yarmarkada Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarının fermerləri meyvə-tərəvəz, ət-süd məhsulları, Buzovna, Mərdəkan, Giləzi, Goradil broyler fabriklərinin təmsilçiləri quş əti və yumurta satırdılar. Burada mal ətinin kiloqramı 3 manat 60 qəpiyə, qoyun əti 4 manata, quş əti 2 manat 70 qəpiyə, soğan 20, kök 50, çuğundur və alma 40, armud 80, kartof 40-50, mandarin 80 qəpiyə, yumurtanın bir ədədi 8 qəpiyə satılırdı.