REGİONLAR
BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, martın 1-də Bakı şəhərinin əvvəlcədən müəyyən olunmuş yerlərində kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun məhsullar çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Göyçay və digər rayonlardan müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyi mətbuat xidmətinin rəhbəri Murtuzəli Hacıyevin verdiyi məlumata görə, şənbə günü burada əhaliyə 22,65 ton məhsul, o cümlədən 4 ton ət, 0,5 ton ağartı, 7 ton tərəvəz, 8 ton kartof, 1 ton bostan bitkisi, 2 ton meyvə, 10 min ədəd yumurta, 150 kiloqram bal təklif edilmişdir. Qiymətlər bazardakından 20-25 faiz aşağı olmuşdur.
Burada mal ətinin kiloqramı 3 manat 60 qəpiyə, qoyun əti 3 manat 90 qəpiyə, quş əti 2 manat 80 qəpiyə, soğan 20, kök 50, kələm 30, alma 1 manat 20-1 manat 60 qəpiyə, armud 70 qəpik-1 manat 50 qəpiyə, kartof 50-60 qəpiyə, bal 10 manata, yumurtanın bir ədədi 11 qəpiyə satılırdı.
Suraxanıda “Günəş” ticarət mərkəzindəki yarmarkada Qobustan, Samux, Daşkəsən, Quba və Biləsuvar rayonlarının fermerləri satışa 23 tona yaxın məhsul çıxarmışlar.
Kənd Təsərrüfatı Nazirliyinin nümayəndələri bildirmişlər ki, əhalinin tələbatı nəzərə alınaraq bu dəfə yarmarkalara çıxarılan məhsulların miqdarı və çeşidi artırılmışdır. Burada satılan məhsulların qiymətləri bazardakından 25-30 faizə qədər ucuzdur. Satışda meyvə-tərəvəz, bitkiçilik məhsulları, ət-süd məmulatı, konservləşdirilmiş məhsullar vardır. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya Cəlilabad və Göyçay rayonlarının fermerleri 4 tona yaxın məhsul gətirmişdilər. Burada da qiymətlər bazardakından 25-30 faiz ucuzdur.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində Salyan, Kürdəmir, Quba, Şəmkir, Ucar, Ağcabədi, Qax, Biləsuvar, Qəbələ və Şəki rayonlarının fermerləri tərəfindən əhaliyə müxtəlif çeşiddə kənd təsərrüfatı məhsulları, o cümlədən meyvə-tərəvəz, qoz, fındıq, ağartı, ət, bal və s. təklif olunmuşdur.
Rayonun ərazisində fəaliyyət göstərən yarmarkada 182,9 ton kənd təsərrüfatı məhsulu satılmışdır. Qiymətlər bazardakından 35-40 faizə qədər ucuzdur. Alıcılar məhsulların qiymətindən və keyfiyyətindən razıdırlar.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada alıcıların ixtiyarına Qusar, Dəvəçi, Salyan və Astara rayonundan gətirilmiş 54 tona yaxın məhsul verilmişdir.
Salyan Rayon İcra Hakimiyyəti nümayəndəsinin sözlərinə görə, həftə ərzində ümumilikdə 10 tondan artıq müxtəlif növ kənd təsərrüfatı məhsulları satılmışdır. Fermerlər bu tədbirin onlar üçün əhəmiyyətini yaxşı anlayırlar. Bunun nəticəsidir ki, yarmarkaya məhsul çıxarmaq üçün müraciət edən torpaq sahiblərinin sayı gündən-günə artır. Paytaxt sakinləri lazım olan məhsulları razılıqla alır və yarmarkanın uzunmüddətli olmasını arzulayırlar.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada satışa Salyan, Ağdaş və Masallı rayonlarından 7 tondan çox kənd təsərrüfatı məhsulları çıxarılmışdır.
Adətən istirahət günləri bazarlara üz tutan qəsəbə sakinləri bu dəfə alış-veriş etmək üçün yarmarkaya gəlmişdilər. Fikirlərini öyrəndiyimiz alıcılar bildirmişlər ki, artıq bazara getməyə ehtiyac qalmayıb, çünki burada həm qiymətlər 40-50 faiz ucuz, həm də məhsullar təzədir.
Satış yarmarkaları təşkil olunandan bu günədək Ağdaş və Masallı fermerləri qəsəbə sakinlərinə tonlarla kənd təsərrüfatı məhsulu satmışlar.
Yarmarka ərazisində alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdır.
Nərimanov rayonu, Keşlə ticarət mərkəzində təşkil olunmuş yarmarkaya şənbə günü Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarından satışa 111,6 ton məhsul, o cümlədən 6,6 ton ət, 200 kiloqram ağartı, 46,2 ton tərəvəz, 23 ton kartof, 200 kiloqram konserv məhsulu, 35,5 ton meyvə, Giləzi, Goradil broyler fabriklərindən isə 10 min ədəd yumurta gətirilmişdi.
Kənd Təsərrüfatı Nazirliyinin və Nərimanov Rayon İcra Hakimiyyətinin nümayəndələri burada səliqə-sahmana və qiymətlərə nəzarət edirdilər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada Qazax və Ağsu rayonlarından gətirilmiş meyvə-tərəvəz və heyvandarlıq məhsulları ucuz qiymətlərə alıcılara təklif olunurdu. Burada 27 tondan çox məhsul satılmışdır.
Binəqədi rayonunun 6 nömrəli Bakı Texniki Peşə liseyinin qarşısında təşkil olunmuş yarmarkada Bərdə, Ağstafa və Goranboy rayonlarının fermerləri bazardakından 40-50 faiz ucuz qiymətlərə kələm, çuğundur, kartof, kök, alma, süd və digər məhsullar satırdılar.
Şəhər sakinləri burada bazarlıq etməyin onlar üçün çox əlverişli olduğunu bildirirdilər.
Yarmarkaya 16 tondan artıq kənd təsərrüfatı məhsulları gətirilmişdir.
######