REGİONLAR
BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, aprelin 13-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy və digər rayonlardan müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, bazar günü burada əhaliyə 12,9 ton məhsul, o cümlədən 2,5 ton ət, 0,2 ton ağartı, 5 ton tərəvəz, 4 ton kartof, 0,2 ton bostan bitkisi, 1 ton meyvə, 5400 ədəd yumurta, 100 kiloqram bal təklif edilmişdir. Yarmarkada qiymətlər bazardakından 20-25 faiz aşağı olmuşdur.
Burada mal ətinin kiloqramı 4 manata, qoyun əti 4 manat 20 qəpiyə, quş əti 3 manat 60 -3 manat 90 qəpiyə, kök 40-50, kələm 50, alma 1 manat- 1 manat 20 qəpiyə, armud 1 manat- 1 manat 50 qəpiyə, kartof 50-60 qəpiyə, bal 9-10 manata, yumurtanın bir ədədi 9 qəpiyə satılmışdır.
Metronun “Əhmədli” stansiyasının yaxınlığında “Azər” ticarət mərkəzində alıcılar satışa çıxarılmış kənd təsərrüfatı məhsullarının bolluğundan razılıq edirdilər. Onlara Salyan, Kürdəmir, Quba, Şəmkir, Ağcabədi, Qax, Daşkəsən, Biləsuvar, Qəbələ rayonlarından gətirilmiş 20,5 ton kartof, 46 ton meyvə, 19,3 ton ət, 6 ton ağartı və digər kənd təsərrüfatı məhsulları təklif olunurdu.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısında təşkil olunmuş yarmarkada Ağsu və Qazax rayonlarının fermerləri bazardakından 30-35 faiz ucuz qiymətə alma, kök, soğan, kələm, kartof, çuğundur, digər meyvə-tərəvəz və süd məhsulları satırdılar.
Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, şənbə və bazar günlərində burada 33 tonadək məhsul satılmışdır.
Binəqədi rayonunda 6 nömrəli Texniki Peşə Liseyinin qarşısındakı yarmarkada da şəhər sakinlərinə keyfiyyətli və ucuz qiymətlərə kənd təsərrüfatı məhsulları təklif edilirdi. Burada Bərdə, Goranboy və Ağstafadan gətirilmiş 17 tonadək meyvə-tərəvəz və heyvandarlıq məhsulları həvəslə alınırdı.
Nərimanov rayonu, Keşlə ticarət mərkəzində təşkil olunmuş yarmarkada bazar günü paytaxt sakinlərinə Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarından gətirilmiş 68,2 ton məhsul, o cümlədən 2,1 ton ət, 700 kiloqram ağartı, 29,2 ton tərəvəz, 17 ton kartof, 100 kiloqram konserv məhsulu, 19 ton meyvə, Giləzi, Goradil broyler fabriklərindən isə 10 min ədəd yumurta təklif olunmuşdur.
Yarmarkada mal əti 4 manata, qoyun əti 4 manat 20, pendir 2 manat 40 qəpiyə, alma, kartof 40-50, kök 50, çuğundur 40 qəpiyə, pomidor 1manat 50 qəpiyə, xiyar 1manata, yumurtanın bir ədədi 8 qəpiyə satılırdı.
Şəhər sakinləri bazardakından 30-40 faiz ucuz təklif olunan məhsulları həvəslə alır, yarmarkaların təşkilatçılarına minnətdarlıqlarını bildirirdilər.
######