İDMAN


BAKIDA ÜMUMMİLLİ LİDER HEYDƏR ƏLİYEVİN XATİRƏSİNƏ YENİYETMƏ BOKSÇULARIN BEYNƏLXALQ TURNİRİ BAŞLANMIŞDIR

Mayın 7-də Milli Olimpiya Komitəsinin idman kompleksində ümummilli liderimiz Prezident Heydər Əliyevin xatirəsinə həsr olunmuş beynəlxalq turniri başlanmışdır. Azərbaycan Milli Olimpiya Komitəsi, Gənclər, İdman və Turizm Nazirliyi, Boks Federasiyası tərəfindən təşkil olunmuş turnirdə 10 ölkədən – Azərbaycan, Türkiyə, Rusiya, Qazaxıstan, Özbəkistan, Ukrayna, Gürcüstan, Böyük Britaniya, Almaniya və İsveçdən 1987-1989-cu il təvəllüdlü 134 yeniyetmə boksçu 13 çəki dərəcəsində mübarizə aparacaqdır.

Turnir iştirakçıları təntənəli açılış mərasimində görkəmli siyasi xadim Prezident Heydər Əliyevin xatirəsini bir dəqiqəlik sükutla andılar.

MOK-un baş katibi, Avropa Boks Federasiyasının vitse-prezidenti, Azərbaycan Boks Federasiyasının prezidenti Ağacan Əbiyev mərasimdə çıxış edərək, son illər Azərbaycanda idmanın, xüsusən boksun inkişafında Prezident Heydər Əiyevin xidmətlərindən danışdı. O xatırlatdı ki, Azərbaycanda idmanın bu növü üzrə beynəlxalq turnir ilk dəfə 1996-cı ildə dövlət başçısının təşəbbüsü ilə keçirilmişdir. Artıq ənənəyə çevrilən bu turnir dünya idmançıları arasında geniş şöhrətə malikdir. Azərbaycanda belə yüksək səviyyəli yarışların keçirilməsi ölkədə boksun inkişafına böyük təkan verir. Təsadüfi deyil ki, son illər Azərbaycan idmançıları beynəlxalq yarışlarda yüksək nəticələrə nail olmuşlar. Boksçularımız Afina Olimpiadasında iştirak etmək üçün rekord sayda lisenziya qazanmışlar. Azərbaycan boksçuları Afinada 11 çəki dərəcəsindən 9-da medallar uğrunda mübarizə aparacaqlar.

A.Əbiyev ümidvar olduğunu bildirdi ki, Azərbaycanda indiyədək keçirilmiş bütün beynəlxalq yarışlar kimi, bu turnir də belə mötəbər yarışların təşkilində ölkəmizin yüksək nüfuza malik olduğunu təsdiqləyəcəkdir.

Yarışların baş hakimi, Beynəlxalq Boks Federasiyası Hakimlər komitəsinin üzvü Qərib Ərgünci turnirin yaxşı səviyyədə hazırlandığına və qonaqpərvərliyə görə təşkilatçılara təşəkkürünü bildirdi.

Azərbaycanın dövlət himni səsləndi.

Birinci gün 9 çəki dərəcəsində 34 görüş keçirildi.

Mayın 9-da yarımfinal görüşləri olacaqdır. Turnirin qalibləri və mükafatçıları mayın 10-da müəyyən ediləcəkdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.