Möhtərəm Prezident!

Hər bir xalqın həyatında elə tarixi məqamlar olur ki, onun gələcək taleyini həll edir. Bəxtəvər o xalqdır ki, belə məqamlarda taleyini etibar etməyə qüdrətli rəhbər, qeyrətli sərkərdə tapa bilir. Siz məhz belə şəxsiyyətsiniz!

1988-ci ildən başlayaraq AXC-Müsavat iqtidarının müstəqil Azərbaycan dövlətini uçuruma aparan siyasəti nəticəsində sosial-iqtisadi və mədəni-mənəvi böhranın dərinləşməsi xalqımız üçün ağır faciələr doğurdu. Belə bir siyasi ab-hava birinci növbədə biz qadınları həyəcanlandırırdı. Çünki qadınlar şəhid olmuş hər bir Vətən oğlunun yarımçıq qalmış taleyi üçün kədərli günlər yaşayırdı. Belə bir dövrdə dövlətçiliyimizi dağılmaqdan xilas edə biləcək milli liderə ciddi ehtiyac var idi. Bu zərurəti ziyalılarımız, o cümlədən qadınlarımız daha öncə və daha dərindən hiss edirdilər. Belə bir zamanda Siz xalqın imdadına çatdınız. Müharibə gedən bir ölkədə gəlişinizlə siyasi sabitlik yaratdınız, Azərbaycanın suverenliyi və müstəqilliyi, sivil dəyərlərə söykənən demokratik dövlət quruculuğu istiqamətində ağır olduğu qədər də şərəfli bir missiyanı öhdənizə götürdünüz və həyat sübut etdi ki, xalq Sizi hakimiyyətə gətirməkdə heç də səhv etməmişdir. Sizin hakimiyyətə gəlişiniz vətəndaş müharibəsinin qarşısını aldı. Ayrı-ayrı adamlara, qurumlara və siyasi partiyalara tabe olan silahlı hərbi birləşmələr ləğv olunaraq, vahid komandanlığa tabe etdirildi.

Möhtərəm Prezident!

Siz hakimiyyətə gəlişinizlə Ermənistan-Azərbaycan müharibəsində münaqişənin həlli yollarının ilkin mərhələsi kimi, böyük Sülh müqaviləsi bağlananadək atəşkəsə nail olmaqla, Vətən övladlarının qanının axıdılmasına son qoydunuz. Sizin uzaqgörən, müdrik daxili və xarici siyasətiniz Azərbaycanı tarixin səhnəsindən silmək istəyən düşmənlərimizin məkrli, murdar planlarını darmadağın etdi.

Cənab Prezident!

Sizin rəhbərliyinizlə respublikamızda demokratik dövlət quruculuğu müvəffəqiyyətlə həyata keçirilir. Biz qadınlar müharibədə iştirak edə bilməsək də, onun əzablarını bu gün də hiss edirik. Taleyinə çadırlarda yaşamaq məcburiyyəti düşən ana və bacılarımızın hər gün üzləşdiyi çətinlikləri duyur və inanırıq ki, işğal olunmuş Vətən torpaqları Sizin apardığınız müdrik siyasət nəticəsində tezliklə azad olunacaq, didərgin düşmüş soydaşlarımız öz yurd-yuvalarına qayıdacaqlar və ərazi bütövlüyümüz təmin olunacaqdır. Bu sahədə apardığınız məqsədyönlü siyasət öz səmərəsini verməkdədir. Belə ki, Azərbaycanın haqq səsi dünya dövlətləri və təşkilatları tərəfindən müdafiə olunur.

Biz, konfrans iştirakçıları Qarabağ münaqişəsinin sülh yolu ilə həlli yönümündə Sizin apardığınız siyasəti dəstəkləyir və müdafiə edirik.

Hörmətli Prezident!

Dövlətimiz müharibə şəraitində olsa da, kifayət qədər möhkəmlənmişdir. Büdcəmiz lazımınca formalaşmış, əhalinin sosial vəziyyəti xeyli yüksəlmişdir. Bütün bu nailiyyətlərlə yanaşı, həllini gözləyən problemlərimiz, çətinliklərimiz də vardır. Biz əminik ki, Sizin zəngin siyasi və dövlətçilik təcrübənizlə mövcud problemlər həllini tapacaqdır. Qarşıdan prezident seçkiləri gəlir. Biz yekdilliklə belə qərara gəlmişik ki, Bərdə rayonunun qadınları adından Sizin namizədliyinizi irəli sürək. Belə bir qənaətə gəlməyə bizi ölkəmizin və xalqımızın gələcəyi vadar edir. Odur ki, cənab Prezident, 2003-cü ilin prezident seçkilərində namizədliyinizin bizim tərəfimizdən irəli sürülməsinə razılıq verməyinizi xahiş edirik.

Sizə möhkəm cansağlığı, dövlətçiliyimizin möhkəmlənməsi yolunda uğurlar arzulayırıq.