SİYASƏT
BƏRDƏ VƏ TƏRTƏR BÖLGƏSİ SEYİDLƏRİNİN, AĞSAQQALLARININ, ZİYALILARININ, MÜHARİBƏ VƏ ƏMƏK VETERANLARININ, ŞƏHİD AİLƏLƏRİNİN, QARABAĞ MÜHARİBƏSİ ƏLİLLƏRİNİN VƏ İCTİMAİYYƏTİN DİGƏR NÜMAYƏNDƏLƏRİNİN
AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB HEYDƏR ƏLİYEVƏ MÜRACİƏTİ
Hörmətli cənab Prezident!
Azərbaycan tarixinin şanlı səhifələri, o cümlədən dövlət müstəqilliyimiz Sizin adınızla bağlıdır. Keçən əsrin 70-ci illərindən başlayaraq respublikamızda görülmüş əzəmətli quruculuq işləri Azərbaycanı mükəmməl inkişaf yoluna gətirib çıxarmış və müstəqil dövlətçiliyimiz üçün əvəzsiz baza rolunu oynamışdır. Respublika rəhbərliyinə yenidən qayıdışınız tariximizə Milli qurtuluş günü kimi daxil olmuşdur. Məhz Sizin sayənizdə çoxdandır ki, azad, asudə nəfəs alır, övladlarımızın sabahkı taleyi üçün nigaran qalmır, xalqımızın və dövlətimizin gələcəyinə inamla baxırıq.
Sizin müəyyən etdiyiniz demokratik, hüquqi və dünvəyi dövlət quruculuğu prinsipləri, bu istiqamətdə əsas götürülən siyasi xətt ölkəmizin beynəlxalq proseslərdə səmərəli iştirakına imkan yaratmış və dünya dövlətləri arasında layiqli yer tutmasına gətirib çıxarmışdır. Azərbaycanın taleyüklü problemləri bir-birinin ardınca öz həllini tapır. Zorla cəlb edildiyimiz müharibənin ağrılarını sərhədyanı bölgə olaraq Bərdə və Tərtər rayonlarında daha dərindən hiss edirik. Bütün bu ağrı açılara rəğmən Sizin atəşkəsə nail olmağınız, problemin sülh yolu ilə həllini əsas götürməyiniz bizi də razı salır. Ürəkdən inanırıq ki, bu yolun səmərəli mərhələsi hələ qarşıdadır. Bərdə və Tərtər ictimaiyyəti əmindir ki, Prezident kimi Sizin 10 illik fəaliyyətiniz xalqımızın milli maraqlarına, müstəqil dövlətimizin mənafeyinə tam cavab verir.
Cənab Prezident!
Siz bu bölgə ilə həmişə sıx bağlı olmusunuz. Yaşlı və orta nəsillər yaxşı xatırlayırlar ki, Siz 14 dəfə Bərdə rayonuna gəlibsiniz. Hər gəlişiniz bizim həyatımızda iz buraxıb, unudulmaz hadisəyə çevrilibdir. Sizin rəhbərliyiniz altında Azərbaycanın hər yerində olduğu kimi, bu bölgədə də çox böyük uğurlar qazanılmışdır. Kəndlərimiz, demək olar ki, yenidən tikilmişdir. Bərdədə ilk doqquzmərtəbəli bina, 1000 yerlik mədəniyyət sarayı, 16 hektarlıq abidə-park, müasir tələblərə tam cavab verən maliyyə, bank, rabitə, poliklinika, xəstəxana, sanatoriya, kino-teatr binaları və s. inzibati binalar, çoxmərtəbəli yaşayış evləri Sizin göstərdiyiniz diqqətin və əməli köməyin nəticəsidir. Belə yadigarlar Tərtərdə də az deyildir. Bu diqqət, eyni zamanda, yüzlərlə sadə adamın yaxasında ordenlərə, medallara çevrilibdir. Bərdənin sadə əmək adamlarından 4 nəfərinə yaxın keçmişin ən yüksək mükafatı olan Sosialist Əməyi Qəhrəmanın qızıl ulduzu Sizin əlinizlə təqdim edilmişdir. Onlardan iki nəfəri hazırda bizimlədir və hər ikisi Prezident təqaüdçüsüdür.
Bərdə və Tərtər camaatı Sizin diqqətinizi, qayğınızı bu gün də yaxından hiss edir. Biz dərin razılıqla bildirmək istəyirik ki, bu qayğı və diqqət, eyni zamanda, ərazidə məskunlaşmış on minlərlə qaçqın və köçkün soydaşımızın məruz qaldıqları problemlərin və çətinliklərin aradan qaldırılmasına da şərait yaradır. Çoxdan yerli camaatla qaynayıb-qarışmış qaçqın və məcburi köçkün soydaşlarımız da əmindirlər ki, çətin günün ömrünə çox qalmayıbdır. Tezliklə torpaqlarımız işğaldan azad olacaq, onlar da doğma yurd-yuvalarına qayıdacaqlar. Azərbaycanın ərazi bütövlüyü, sərhədlərinin toxunulmazlığı bərpa olunacaqdır.
Bir çoxumuz Sizinlə dəfələrlə bir salonda olmuş, görüşlərinizdə, söhbətlərinizdə iştirak etmişik. Siz də bu bölgənin adamlarına bələdsiniz, çoxumuzu şəxsən tanıyırsınız. Bu sıx və səmimi münasibət bizi həmişə sevindirmiş və ruhlandırmışdır.
Biz peşəkar siyasətdən uzaq adamlarıq. Buna baxmayaraq, ölkəmizdə və dünyada baş verən prosesləri bir-birindən ayırmağı, yaxşını pisdən, düzü əyridən seçməyi bacarırıq. Dövlətimiz və xalqımız üçün gördüyünüz işlər göz qabağındadır. 1994-cü ildə “Əsrin müqaviləsi” imzalananda çoxları buna yuxu kimi baxırdı. Halbuki, onun və digər neft müqavilələrinin səmərəsi xeyli vaxtdır ki, görünməkdədir. Sonralar Bakı-Tbilisi-Ceyhan əsas ixrac boru kəməri, Bakı-Ərzurum qaz kəməri, qədim İpək Yolunun bərpası və digər təşəbbüslər də çoxlarına möcüzə kimi görünürdü. Bəli, bunlar doğrudan da möcüzələrdir, lakin reallaşan və reallaşmaqda olan möcüzələrdir. Yaxşı bilirik ki, ölkədə yaratdığınız siyasi sabitlik olmasaydı, bütün bunlar ən yaxşı halda arzu olaraq qalardı.
Bir aydan çoxdur ki, 2003-cü ilə qədəm qoymuşuq. Bu il seçim ilidir. Yeni il bizim hər birimiz üçün yeni ümidlər doğurur. Dövlətimiz müharibə şəraitində olsa da, möhkəmlənmişdir. Büdcəmiz kifayət səviyyədə formalaşmış və sosial yönüm almışdır. Bütün bu nailiyyətlərlə yanaşı, həllini gözləyən problemlərimiz, çətinliklərimiz də hələ çoxdur. Biz yekdilliklə belə düşünürük ki, Sizin zəngin siyasi və dövlətçilik təcrübənizə, müdrikliyinizə, qeyri-adi biliyinizə və bacarığınıza xalqımızın, müstəqil respublikamızın, dövlətimizin hələ çox ciddi ehtiyacı vardır. Gələcəyə ümidimiz nə qədər böyük olsa da, bu milli ehtiyac bizi bir daha dərindən düşünməyə, götür-qoy etməyə vadar edir.
Cənab Prezident!
Siz dəfələrlə tarixin ağır sınaqlarından çıxmış müdrik adamsınız. Yəqin ki, bizi daha yaxşı başa düşürsünüz. İşlədiyiniz bütün illərdə həmişə xalqın səsini eşitmisiniz. Xalqımızın bir hissəsi olaraq biz, növbəti prezident seçkilərində Sizin namizədliyinizi irəli sürməyi qərara almışıq. Bu, Bərdə və Tərtər camaatının, demək olar, yekdil fikridir. Bizi belə bir rəyə gəlməyə ölkəmizin və xalqımızın gələcəyi vadar edir. Ona görə də müraciətimizi qəbul etməyinizi, 2003-cü ilin prezident seçkilərində namizədliyinizin bizim tərəfimizdən irəli sürülməsinə razılıq verməyinizi xahiş edirik.
Sizə möhkəm cansağlığı, dövlətçiliyimizin inkişafı yolunda uğurlar arzulayırıq.
Seyid Yusif ağa - Seyid Hüseyn ocağı
Seyid Qurban - Seyid Mövsüm ocağı
Seyid İsa ağa - Seyid Fuğara ocağı
Seyid Əli ağa - Seyid Manaf ocağı
Seyid Əyub ağa - Seyid ocağı
Seyid Yusif ağa - Seyid Mirpaşa ocağı
Seyid İkram ağa - Seyid Mirpaşa ocağı
Seyid Yusif ağa
Seyid Asif ağa - Seyid Əsəd ocağı
Seyid İslam ağa - Seyid Məhəmməd ocağı
Seyid İsa ağa - Seyid İmran ocağı
Seyid İsa ağa - Seyid Bəhmən ocağı
Seyid Vaqif ağa
Seyid Əskər ağa - Seyid Müzəffər ocağı
Seyid Mirdamət ağa - Seyid Həsənağa ocağı
Seyid Səlim ağa - Seyid Ağababa ocağı
Seyid İsmayıl ağa
Seyid Cahid ağa - Tərtər
Seyid Əli ağa - Güloğlular
Seyid Abbas ağa - Seyid Məcid ocağı
Seyid Miryaqub
Seyid Akif ağa - Seyid İsmayıl ocağı
Seyid Cəmil ağa - Seyid İsmayıl ocağı
Seyid Miri ağa - Seyid Ağa ocağı
Seyid Qafar ağa - Seyid Əli ocağı
və başqaları cəmi 310 imza.