AZƏRTAC-ın xarici informasiya agentliklərindən aldığı xəbərə görə, avqustun 13-də səhər maska taxmış silahlılar İraqın Bəsrə şəhərinin “Əz-Ziyafət” mehmanxanasında britaniyalı jurnalisti oğurlamışlar. Onun adı və təmsil etdiyi kütləvi informasiya vasitəsi açıqlanmır. Mehmanxana işçiləri demişlər ki, jurnalist girov götürülərkən odlu silah yaraları almışdır.

Onu girov aparan naməlum qruplaşma bir qədər sonra bəyanat verərək, Nəcəf şəhərində gedən döyüş əməliyyatlarının 24 saat ərzində dayandırılmasını tələb etmiş və bildirmişdir ki, əks halda, jurnalisti öldürəcəklər.