SİYASƏT
BAŞ PROKURORLUQDA GÖRÜŞ
Azərbaycan Respublikası Prokurorluğunun mətbuat xidmətindən AZƏRTAC-a bildirmişlər ki, baş prokuror Zakir Qaralov fevralın 3-də ölkəmizdə səfərdə olan ATƏT-in Demokratik təsisatlar və insan hüquqları Bürosunun direktoru Kristian Ştrohalın rəhbərlik etdiyi nümayəndə heyəti ilə görüşmüşdür.
Qonaqları səmimi salamlayan Baş prokuror Zakir Qaralov Azərbaycanın yeni minilliyə Avropa Şurasının üzvü kimi qədəm qoymasını ölkəmizdə demokratik dəyərlərin bərqərar olmasının, hüquqi dövlət quruculuğu istiqamətində əhəmiyyətli inkişafın qanunauyğun nəticəsi olduğunu qeyd edərək bildirmişdir ki, ölkəmiz Ümumavropa inteqrasiya proseslərinə fəal qoşulmuşdur və hüquqi dövlətin qəbul edilmiş prinsiplərini, o cümlədən məhkəmə-hüquq sisteminin islahatlarını uğurla həyata keçirir.
Vurğulanmışdır ki, Azərbaycanın ümummilli lideri Heydər Əliyevin bilavasitə rəhbərliyi və təşəbbüsü ilə ölkəmizdə həyata keçirilən məhkəmə-hüquq islahatları Azərbaycan Prezidenti İlham Əliyevin rəhbərliyi ilə uğurla davam etdirilir. “Məhkəmələr və hakimlər haqqında” Qanuna Avropa Şurasının tələblərinə uyğun dəyişiklik və əlavələr edilərək, bu il yanvarın 30-dan yeni məhkəmə sisteminin formalaşması və fəaliyyəti ilə bağlı “Məhkəmə hüquq şurası haqqında” Azərbaycan Respublikasının Qanunu qəbul edilmişdir. Bu qanunlar ölkəmizdə məhkəmə hakimiyyətinin müstəqilliyinə və hakimlərin toxunulmazlığına tam təminat verir.
Dövlət ittihamının məhkəmədə müdafiəsi mexanizminin səmərəliliyini təmin etmək məqsədi ilə Baş Prokurorluğun dövlət ittihamının müdafiəsi üzrə idarəsinin strukturu dəyişdirilmiş, həmin idarə daha təcrübəli kadrlar hesabına yenidən formalaşdırılmışdır. Prokurorluğa işə qəbulun müsabiqə yolu ilə keçirilməsi də ölkəmizdə aparılan islahatların uğurlu nəticəsidir.
Ölkəmizin bir sıra mühüm beynəlxalq konvensiyalara qoşulması, “Ombudsman haqqında” Qanunun, Avropa Şurasında ekspertizadan keçirildikdən sonra “Korrupsiya ilə mübarizə haqqında” Qanunun və Dövlət Proqramının qəbul olunması, məhkum edilmiş şəxslərin amnistiya aktları və əfv fərmanlarına əsasən cəzalardan azad edilməsi və bu istiqamətdə həyata keçirilən digər tədbirlər ölkəmizdə insan hüquq və azadlıqlarının təmin olunması istiqamətində xeyli iş görüldüyünü və bu işin ardıcıl olaraq həyata keçirildiyini bir daha təsdiq edir.
Qeyd edilmişdir ki, Azərbaycan höküməti və prokurorluğu ATƏT ilə əməkdaşlığın genişləndirilməsində və daha da inkişaf etdirilməsində maraqlıdır. 2002-ci il noyabrın 25-27-də ATƏT-in Demokratik Təsisatlar və İnsan Hüquqları Bürosunun dəstəyi və köməyi ilə Azərbaycan Respublikası Daxili İşlər Nazirliyinin keçirdiyi “Ailədə zorakılıqla mübarizə” mövzusunda seminar və bu kimi digər tədbirlər əlaqələrin inkişafının əyani təzahürüdür.
Baş prokuror daha sonra dedi ki, ATƏT-in Demokratik Təsisatlar və İnsan Hüquqları Bürosunun Azərbaycan Respublikası üzrə hazırladığı məhkəmə monitorinqi hesabatı müzakirə edildikdən sonra müvafiq fikir bildiriləcəkdir.
Görüşün sonunda baş prokuror Zakir Qaralov kadrların təkmilləşdirilməsi işində ATƏT-in müvafiq institutları ilə əməkdaşlığın genişləndirilməsinin önəmli olduğunu diqqətə çatdırdı.
Səmimi qəbula görə minnətdarlığını bildirən ATƏT-in Demokratik Təsisatlar və İnsan Hüquqları Bürosunun direktoru Kristian Ştrohal Azərbaycan Respublikası ilə əməkdaşlıq əlaqələrinin genişləndirilməsinə xüsusi əhəmiyyət verdiyini vurğulayaraq, bu münasibətlərin daha da inkişaf etdirilməsinin demokratik cəmiyyət quruşuluna öz töhfəsini verəcəyini bildirdi.
Görüşdə insan və vətəndaş hüquqları və azadlıqlarının qorunması, məhkəmə-hüquq islahatlarının nəticələri ilə bağlı qonaqları maraqlandıran suallara cavablar verildi.