ELM VƏ TƏHSİL


BDU-da Ümumdünya Aviasiya və Kosmonavtika Gününə həsr edilmiş tədbir keçirilib

Bakı, 12 aprel, AZƏRTAC

Bu gün Bakı Dövlət Universitetində (BDU) 12 Aprel - “İnsanın Kosmosa Uçuşu” Beynəlxalq Gününə həsr olunmuş onlayn tədbir keçirilib.

Universitetdən AZƏRTAC-a bildirilib ki, moderator, BDU-nun Elmi fəaliyyətin təşkili və innovasiyalar Mərkəzinin müdiri, professor Mais Süleymanov 1961-ci ildə sovet hərbi təyyarəçisi Yuri Qaqarinin ilk pilotlu uçuşunun həyata keçirildiyi 12 aprelin bütün dünyada, eləcə də Azərbaycanda Aviasiya və Kosmonavtika Günü kimi qeyd edildiyini vurğulayıb.

BDU-nun rektoru Elçin Babayev qeyd edib ki, dünyanın kosmik sənaye sahəsindəki nailiyyətləri Azərbaycanda bu elmin və sənayenin inkişafına böyük təkan verib. Bu sahədə yeni elm və istehsalat sahələri yaranıb, milli kadrlar məktəbi formalaşmağa başlayıb. Rektor respublikamızda kosmik sənayenin yaradılmasının ümummilli lider Heydər Əliyevin adı ilə bağlı olduğunu nəzərə çatdırıb. Bildirib ki, müstəqil ölkəmizin kosmik sənayesi isə Ulu Öndərin ideyalarının layiqli davamçısı, Prezident İlham Əliyevin rəhbərliyi ilə sürətlə inkişaf edib, bu sahədə bir sıra uğurlara imza atılıb. Ölkə başçısının “Azərbaycan Respublikasında kosmik sənayenin yaradılması və inkişafı üzrə Dövlət Proqramının təsdiq edilməsi haqqında” 2009-cu il 17 avqust tarixli Sərəncamı bu sahəyə göstərilən diqqətin bariz nümunəsidir. 2010-cu il mayın 3-də Rabitə və İnformasiya Texnologiyaları Nazirliyinin nəzdində (indiki Nəqliyyat, Rabitə və Yüksək Texnologiyalar Nazirliyinin) Qafqazda əsas peyk operatoru olan "Azərkosmos" Açıq Səhmdar Cəmiyyəti təsis edilib. Milli Aerokosmik Agentlik ölkəmizin müdafiə qüdrətinin möhkəmlənməsinə, peyk kəşfiyyatı, naviqasiya rabitəsi, həmçinin ekoloji problemlərin və mülki təyinatlı məsələlərin həllinə öz töhfəsini verməkdədir.

E.Babayev çıxışında Prezident İlham Əliyevin rəhbərliyi ilə həyata keçirilən uğurlu siyasət nəticəsində digər sahələrlə yanaşı, kosmik sənaye sahəsində bundan sonra da bir çox uğurlara imza atılacağını, doğma Azərbaycanımızın adının qabaqcıl kosmik ölkələr sırasında olacağına əminliyini bildirib.

Sonra “Azərkosmos” ASC sədrinin müavini Dunay Bədirxanovun “Azərbaycanın peykləri”, Xəzər Universiteti EILINK Tədqiqat və İnkişaf Mərkəzinin baş məsləhətçisi Rüstəm Rüstəmovun “Tərsinə Astronomiya – məsafədən duyma və coğrafi məlumat sistemi”, AMEA-nın Geologiya və Geofizika İnstitutunun baş elmi işçisi Fuad Hacızadənin “Azərbaycanda aerokosmik tədqiqatlar”, Milli Aviasiya Akademiyasının doktorantı Sona Quliyevanın “Aerokosmik sahədə Milli Aviasiya Akademiyasının fəaliyyəti”, Milli Aviasiya Akademiyasının tələbəsi Sərxan Ağadadaşovun “Qlayder – peyk tipli uçan aparat layihəsi”, dizayner və fotoqraf, həvəskar astronom, Azərbaycan Astroklubunun üzvü Faiq Nağıyevin “Azərbaycanda astrofotoqrafiya: Kosmos fotolarda” mövzusunda məruzələri dinlənilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.