ELM VƏ TƏHSİL


BDU ilə Qazaxıstan universitetləri arasında əməkdaşlıq genişlənir

Bakı, 5 iyul, AZƏRTAC

Bakı Dövlət Universiteti (BDU) ilə Qazaxıstan universitetləri arasında əməkdaşlıq daha da genişlənir. Hazırda BDU-da 7 ikili diplom layihəsi proqramı fəaliyyət göstərir. Onlardan 2-si Qazaxıstanın tanınmış universitetləri ilə reallaşdırılıb.

Bu barədə AZƏRTAC-a BDU-dan məlumat verilib. Bildirilib ki, Bakı Dövlət Universitetində beynəlxalq təcrübədən, qabaqcıl elmi nailiyyətlərdən, innovativ təlim-tədris texnologiyalarından faydalanmaq üçün dünyanın bir sıra qabaqcıl universitetləri ilə beynəlxalq ikili diplom proqramlarının həyata keçirilməsi istiqamətində davamlı işlər görülür. BDU-da tədrisin məzmun və keyfiyyət göstəricilərinin beynəlxalq standartlara uyğunlaşdırılması, universitetin beynəlxalq rəqabətliliyinin artırılması və ölkəmizdə yeni nəsil yüksəkixtisaslı mütəxəssislərin hazırlanması məsələsinə xüsusi diqqət yetirilir. Belə ki, BDU ilə Qazaxıstanın Əl-Fərabi adına Qazax Milli Universiteti arasında “Dəniz və enerji hüququ” adlı magistratura proqramının təşkili ilə bağlı imzalanmış müqaviləyə əsasən, 2020-ci ildən ingilis dilində birgə magistr hazırlığı həyata keçirilir. Bu proqram digər xarici ali təhsil müəssisələrinin də diqqətini çəkib.

BDU ilə K.İ.Satbayev adına Qazax Milli Tədqiqat Texniki Universiteti (QMTTU) arasında 2021-ci ildə imzalanmış müqaviləyə əsasən isə BDU-nun Kimya fakültəsi və QMTTU-nun Kimya və Biotexnologiyalar İnstitutunun magistratura proqramının bazasında “Neft kimyası” ixtisaslaşması üzrə magistratura səviyyəsində birgə ikili diplom proqramı həyata keçirilir. Bu proqram çərçivəsində neft kimyası və kimya mühəndisliyi elmləri üzrə yüksəkixtisaslı mütəxəssislərin yetişdirilməsi nəzərdə tutulur.

Hazırda Qazaxıstanın L.N.Qumilyov adına Avrasiya Milli Universiteti və Ş.Yessenov adına Xəzər Dövlət Texnologiyalar və Mühəndislik Universiteti ilə ikili diplom layihələrinin reallaşdırılması son mərhələdədir.

2021-2022-ci tədris ilində BDU-da ümumilikdə 7 nəfər Qazaxıstan vətəndaşı təhsil alır. Onlardan biri təhsil qrantı proqramı üzrə Beynəlxalq münasibətlər və iqtisadiyyat fakültəsinin tələbəsidir. BDU ilə Yessenov Dövlət Universiteti arasında imzalanmış memoranduma əsasən, 2021-2022-ci tədris ilinin yaz semestrində 4 tələbə tətbiqi riyaziyyat və kibernetika və hüquq fakültələrində mübadilə yolu ilə təhsillərini davam etdiriblər. BDU ilə Abay adına Qazax Milli Pedaqoji Universiteti arasında imzalanmış memoranduma əsasən, bir nəfər doktorant 2021-2022-ci tədris ilinin yaz semestrində Sosial elmlər və psixologiya fakültəsində, Əl-Fərabi Qazax Milli Universiteti ilə imzalanmış memoranduma əsasən isə 2 nəfər magistrant Biologiya fakültəsində təcrübə keçib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.