ELM VƏ TƏHSİL
BDU-nun magistrantı “Çağdaş tatar hekayələri antologiyası”nı Azərbaycan dilinə tərcümə edib
Bakı, 6 aprel, AZƏRTAC
Bakı Dövlət Universitetinin (BDU) Türkologiya kafedrasının magistrantı, Tələbə Elmi Cəmiyyəti nəzdində Türkoloji dərnəyin rəhbəri Məleykə Mirzəlinin tərcüməsində nəşr edilmiş “Çağdaş tatar hekayələri antologiyası” adlı kitabın Rusiya Federasiyasının Tatarıstan Respublikasının Azərbaycandakı nümayəndəliyində təqdimatı keçirilib.
Universitetdən AZƏRTAC-a bildirilib ki, 31 müasir tatar nasirinin hekayələrindən ibarət olan kitabın redaktoru və ön sözünün müəllifi BDU-nun Azərbaycan ədəbiyyatı tarixi kafedrasının dosenti Məti Osmanoğludur.
Milli Məclisin Mədəniyyət komitəsinin eksperti Əkbər Qoşalı rəhbəri olduğu layihə haqqında məlumat verib və nəşrin əhəmiyyətindən söz açıb.
Tatarıstanın Azərbaycandakı nümayəndəliyinin daimi nümayəndəsi Murad Qadılşin layihə əsasında tərtib olunmuş bu kitabı mühüm ədəbi-mədəni hadisə hesab edib və nəşrin ərsəyə gəlməsində əməyi olan hər kəsə təşəkkürünü bildirib.
Milli Məclisin Mədəniyyət komitəsinin sədri, kitabın məsləhətçisi Qənirə Paşayeva bu nəşrin Azərbaycan-Tatarıstan ədəbi-mədəni əlaqələrinin möhkəmlənməsinə dəyərli töhfə olduğunu diqqətə çatdırıb.
Sonra Tatarıstanın deputatı, Tatarıstan Yazıçılar Birliyinin sədri Rkail Zəydulla, hekayələrin tərcüməçisi Məleykə Mirzəli və dosent Məti Osmanoğlu kitabla bağlı fikirlərini bölüşüblər.
Sonda kitabın tərtibçiləri təltif edilib və oxucular üçün kitablar imzalanıb.