ELM VƏ TƏHSİL


BDU-ya Yaponiya Nippon Fondunun hədiyyəsi olan kitablar təqdim edilib

Bakı, 4 iyun, AZƏRTAC

Yaponiyanın Azərbaycandakı fövqəladə və səlahiyyətli səfiri Cuniçi Vada Bakı Dövlət Universitetində (BDU) olub. Səfir Yaponiya Nippon Fondunun hədiyyəsi olan 69 adda kitabı BDU-nun Elmi Kitabxanasına hədiyyə edib.

Universitetdən AZƏRTAC-a bildirilib ki, əvvəlcə BDU-nun rektoru Elçin Babayev Yaponiyanın ölkəmizdəki səfiri ilə görüşüb, tərəflər əməkdaşlıq perspektivlərini müzakirə ediblər. Görüşdə rektor Elçin Babayev Azərbaycan və Yaponiya arasında dostluq əlaqələrindən, BDU, xüsusilə də Şərqşünaslıq fakültəsi ilə səfirlik arasında əməkdaşlıq münasibətləri haqqında söz açıb. O, Yaponiyanın elm və təhsil müəssisələri ilə qarşılıqlı əlaqələrin qurulması, birgə elmi-tədqiqat işlərinin aparılması, Yaponiya universitetləri ilə ikili diplom proqramları, tələbə mübadiləsi və s. istiqamətlərdə əməkdaşlığın qurulması və mövcud əlaqələrin inkişaf etdirilməsinin vacibliyini vurğulayıb.

Səfir Cuniçi Vada BDU ilə Yaponiya səfirliyi və ölkəsinin universitetləri arasında əlaqələrin inkişaf etdirilməsi, təcrübə mübadiləsi və s. sahələrdə əməkdaşlığa xüsusi diqqət göstərdiklərini qeyd edib. BDU-da yapon dili və mədəniyyətinin tədris olunmasından məmnunluğunu bildirib. Qeyd edib ki, 2022-ci ildə Yaponiya ilə Azərbaycan arasında diplomatik əlaqələrin qurulmasının 30-cu ildönümü geniş qeyd olunacaq və bu tədbirlər çərçivəsində yapon dili və mədəniyyətinin tədris olunduğu BDU-da bir sıra tədbirlərin keçirilməsi, birgə layihələrin həyata keçirilməsi planlaşdırırlır.

Sonra BDU-nun Elmi Kitabxanasında Yaponiya Nippon Fondunun hədiyyə etdiyi kitabların təqdimat mərasimi keçirilib. Tədbirdə BDU-nun rektoru Elçin Babayev və səfir Cuniçi Vada çıxış ediblər. Mərasimdə yapon dili, ədəbiyyatı, mədəniyyəti, tarixi, elmi, iqtisadiyyatından və s. bəhs edən kitablar Elmi Kitabxanaya təqdim olunub.

Səfir BDU-nun Elmi Kitabxanasının Nadir kitablar fondunda mühafizə olunan qədim, nadir nəşrlərlə, o cümlədən Yaponiya barədə kitablarla tanış olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.