AZƏRTAC-ın xüsusi müxbiri xəbər verir ki, sentyabrın 16-da Almaniyanın paytaxtında yeni nümunəvi idman malları ticarət mərkəzi qapılarını istehlakçıların üzünə açmışdır. Ticarət mərkəzinin açılış mərasimində FİFA-nın, Almaniya Futbol Federasiyaları Assosiasiyasının rəhbərliyi, Ümumdünya Ticarət Təşkilatının nümayəndələri iştirak etmişlər.

2006-cı ildə Almaniyada keçiriləcək futbol üzrə dünya birinciliyinin təşkilat komitəsinin sədri Frans Bekkenbauer ticarət mərkəzinin önündəki lenti kəsərək qonaqları və ictimaiyyəti sərgi-satış salonlarına dəvət etmişdir.

Almaniyanın dünya şöhrətli “Karstadt” ticarət konserninin yaratdığı ilk nümunəvi ticarət mərkəzi istehlakçılara məşhur alman firmalarının, xüsusilə, “ADİDAS”-ın 2006-cı il futbol çempionatına yeni töhfələrini - yüksək lisenziyalı və çeşidli idman mallarını təqdim edir. Konsern yaxın vaxtlarda Almaniya ərazisində və dünyanın digər ölkələrində bu növ 300-dən artıq nümunəvi ticarət mərkəzi açmağı planlaşdırır.