SİYASƏT


BERNAMA agentliyi: Azərbaycan Qələbə Gününü noyabrın 8-də qeyd edəcək

Kuala Lumpur, 5 dekabr, AZƏRTAC 

Malayziyanın BERNAMA Milli İnformasiya Agentliyi Azərbaycan Prezidenti İlham Əliyevin hər il noyabrın 8-də ölkəmizdə Qələbə Gününün qeyd edəcəyi barədə bəyanatını yayıb.

AZƏRTAC-ın xüsusi müxbiri xəbər verir ki, Malayziya agentliyinin AZƏRTAC-a istinadla yaydığı məlumatda Prezident İlham Əliyevin Qarabağda altı həftə davam etmiş döyüşlərin noyabrın 10-da qələbə ilə başa çatdığını elan etdiyi bildirilir. Qeyd edilir ki, Türkiyədə Mustafa Kamal Atatürkün həmin gün vəfat etdiyi nəzərə alınaraq, Azərbaycan dövlətinin başçısı Qələbə Gününün noyabrın 8-də, Qarabağın incisi sayılan Şuşa şəhərinin erməni işğalından azad edildiyi günə dəyişdirilməsi barədə qərar qəbul edilib.

Məqalədə Azərbaycan xalqının ümummilli lideri Heydər Əliyevin sözləri də sitat gətirilib: “Mustafa Kamal Atatürk bütün türklər üçün əziz və hörmətli şəxsiyyətdir, onu azərbaycanlılar da yüksək qiymətləndirirlər və ona hörmətlə yanaşırlar”.

Yazıda Mustafa Kamal Atatürkün “Azərbaycanın sevinci sevincimiz, kədəri kədərimizdir” sözlərinin türk dünyasının tarixinə qızıl hərflərlə yazıldığı vurğulanır.

Bildirilir ki, Şuşanın azad edilməsi İkinci Qarabağ və ya Vətən müharibəsində həlledici əhəmiyyətə malikdir və məhz bu şəhərin azad edilməsi Ermənistanın baş nazirini məğlub olmaq barədə bəyanatı imzalamağa vadar edib, Bakı ilə Yerevan arasında müharibəyə son qoyub.

Məqalədə Azərbaycan Prezidentinin Vətən müharibəsi şəhidlərinin xatirəsinin əbədiləşdirilməsi barədə Sərəncamı barədə də məlumat verilib.

Qeyd edilib ki, Prezident İlham Əliyevin Sərəncamı ilə dekabrın 4-də saat12-də bütün ölkə ərazisində Vətən müharibəsində həyatlarını qurban verən şəhidlərin xatirəsinin anılması məqsədilə bir dəqiqəlik sükut elan edilib.

Yazıda Azərbaycan Respublikası Müdafiə Nazirliyinə istinadla Qarabağ regionu, Ermənistan ordusu tərəfindən işğal edilmiş ərazilər uğrunda gedən döyüşlərdə 2783 əsgərimizin şəhidi olduğu da bildirilir.

Qeyd edilir ki, Azərbaycan lideri sentyabrın 27-sini “Şəhidlərin Anım Günü” elan edib.

Məqalədə Ermənistan-Azərbaycan Dağlıq Qarabağ münaqişəsinin tarixi barədə də geniş məlumat verilir. Qeyd edilir ki, Qarabağ regionu və ətrafda yerləşən yeddi rayon beynəlxalq səviyyədə Azərbaycan ərazisi kimi tanınır. Bu ərazilər ötən əsrin 90-cı illərində aparılan hərbi əməliyyatlar nəticəsində xarici havadarlarına arxalanan Ermənistan tərəfindən işğal edilib. Sentyabrın 27-də Azərbaycan Ordusunun Ermənistanın təxribatlarına qarşı başladığı əks-hücum əməliyyatı 44 gün davam edib və bu əməliyyatlar nəticəsində dörd şəhər və təqribən 300-dək yaşayış məntəqəsi işğaldan azad edilib.

Vüqar Ağayev

AZƏRTAC-ın xüsusi müxbiri

Kuala Lumpur

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.