SİYASƏT
BERNAMA agentliyi: Azərbaycan işğaldan azad edilmiş ərazilərdə müvəqqəti xüsusi idarəetmə yaradır
Kuala Lumpur, 1 noyabr, AZƏRTAC
Malayziyanın BERNAMA Milli İnformasiya Agentliyi Prezident İlham Əliyevin Fərmanı ilə Azərbaycanın işğaldan azad edilmiş ərazilərində müvəqqəti xüsusi idarəetmənin yaradılacağı barədə məlumat yayıb.
Məlumatda Azərbaycan Dövlət İnformasiya Agentliyinə (AZƏRTAC) istinadla xəbər verilir ki, işğaldan azad edilən hər bir rayonda müvəqqəti xüsusi idarəetməni həyata keçirəcək komendantlıq yaradılacaq və ona rəhbərlik edəcək komendant Daxili İşlər Nazirliyi tərəfindən təyin olunacaq.
Bununla yanaşı, komendantın öz fəaliyyətini Müdafiə Nazirliyi və Dövlət Sərhəd Xidməti ilə əlaqələndirəcəyinin sənəddə öz əksini tapdığı da qeyd edilir.
Məlumatda Fərmandan gətirilən sitatda deyilir: “Müvəqqəti komendantlıqlar mühüm əhəmiyyətli obyektlərin, o cümlədən nəqliyyat və telekommunikasiya infrastrukturu obyektlərinin, enerji və su təchizatı sistemlərinin, su anbarlarının, insanlar və ətraf mühit üçün yüksək təhlükə mənbəyi olan xüsusi obyektlərin mühafizəsini təşkil etsinlər”.
Bu komendantlıqların, həmçinin aşkar edilən hərbi texnikanın, silahın, döyüş sursatının, zəhərləyici və partlayıcı maddələrin toplanması, inventarlaşdırılması və mühafizəsini, eyni zamanda ictimai qaydanı və təhlükəsizliyi təmin edəcəyi də bildirilir.
Fərmandan gətirilən növbəti sitatda qeyd edilir: “Müvəqqəti komendantlıqlar aidiyyəti dövlət orqanları ilə birlikdə minalardan təmizləmə və zərərsizləşdirmə işlərinin aparılması, terrorçuluq, casusluq, təxribat və Azərbaycan Respublikasına qarşı yönəldilmiş digər qanunazidd fəaliyyətin qarşısının alınması, ətraf mühitin qorunması, topoqrafiya və xəritəçəkmə işlərinin aparılması, təbii sərvətlərdən səmərəli istifadə məqsədilə onların ilkin qiymətləndirilməsi və mühafizəsi üçün zəruri tədbirlər görsünlər”.
Məqalədə Ermənistan-Azərbaycan Dağlıq Qarabağ münaqişəsinin tarixi və səbəbləri barədə də ətraflı məlumat verilir.
Qeyd edilir ki, Ermənistanın Azərbaycana qarşı əsassız torpaq iddialarına 1988-ci ildə başlanıb. 1992-ci ildə iki keçmiş sovet respublikası arasında müharibəyə çevrilən münaqişə xarici havadarlarına arxalanan Ermənistanın qələbəsi ilə yekunlaşıb. 1994-cü ilin mayında tərəflər arasında atəşkəs elan olunsa da, Ermənistan Azərbaycan ərazilərinin 20 faizini işğal edib. Dağlıq Qarabağda yaşayan separatçı ermənilər müstəqil respublika elan etsələr də bu qondarma “dövlət” heç bir beynəlxalq qurum və dövlət tərəfindən tanınmayıb. 1993-cü ildə BMT Təhlükəsizlik Şurası Ermənistan ordusunun Azərbaycanın işğal edilmiş bütün ərazilərindən dərhal və qeyd-şərtsiz çıxarılması barədə dörd qətnamə qəbul etsə də, Ermənistan hökuməti bu sənədləri icra etməyib.
Cari il sentyabrın 27-də Ermənistan ordusunun növbəti təxribatının qarşısını alan Azərbaycan Silahlı Qüvvələri əks-hücuma keçərək işğal altında olan torpaqları azad etməyə başlayıb.
Vüqar Ağayev
AZƏRTAC-ın xüsusi müxbiri
Kuala Lumpur