ELM VƏ TƏHSİL


“BEYT” şirkəti “TEKNOFEST Azərbaycan” festivalında intellektual texnoloji məhsullar təqdim edəcək

Bakı, 11 may, AZƏRTAC

AMEA-nın Yüksək Texnologiyalar Parkının (YTP) rezidenti olan “BEYT” MMC mayın 26-29-da “TEKNOFEST Azərbaycan” festivalı çərçivəsində təşkil olunacaq sərgidə iştirak edəcək.

Bu barədə AZƏRTAC-a “BEYT” MMC-nin icraçı direktoru Emil Əhmədov məlumat verib. O, qurumun təqdim edəcəyi layihələrin əhəmiyyətli texnoloji yeniliklər olduğunu bildirib. Qeyd edib ki, festivalda texnoparkda aparılmış uzunmüddətli tədqiqatların nəticəsi olan, rəqabətədözümlü, intellektual texnoloji məhsullar nümayiş olunacaq.

İcraçı direktor sərgidə təqdim olunacaq “Smart” arı yeşiklərinin istehsalının təşkili” layihəsi barədə danışaraq, son zamanlar onların intellektuallaşdırılması istiqamətində mühüm işlər aparıldığını bildirib. O, texnoparkın mütəxəssisləri tərəfindən yeşiklərə yerləşdirilmiş xüsusi sensorlar sayəsində arıçılıq təsərrüfatı ilə məşğul olan sahibkarların əraziyə mütəmadi getmələrinə ehtiyac qalmadan, uzaq məsafədən mobil telefon vasitəsilə yeşiyin vəziyyətinə nəzarət edə biləcəklərini deyib. O, “ağıllı” yeşiklərin temperatur, coğrafi yerləşmə və yerdəyişmə, arıların hərəkəti və xəstəliklərinin diaqnostikası kimi üstünlüklərə malik olduğunu vurğulayıb.

Emil Əhmədov yüksək ixrac potensialı olan məhsulun bu günə qədər ölkəmizə əsasən Fransadan gətirildiyini bildirib, layihənin ölkəmizdə həyata keçirilməsinin rəqabətədözümlü milli intellektual məhsullarının istehsal edilməsi baxımından mühüm əhəmiyyət daşıdığını söyləyib.

“Ölkəmizdə “ağıllı” arı yeşiklərini istehsal etməklə burada arıçılıqla məşğul olan sahibkarlara daha əlçatan və münasib qiymətə bu innovativ yeniliyi təqdim etmiş olacağıq”, – deyə bildirən icraçı direktor layihənin təsərrüfat subyektlərinə kompleks həllər təklif etdiyini və arıçılıq təsərrüfatının inkişafına böyük töhfələr verəcəyinə əminliyini ifadə edib.

Qurumun rəsmisi, həmçinin “LED lampa üçün diod və mikrosxemlərin istehsalının təşkili” layihəsindən söz açıb. O, LED lampa üçün diod və mikrosxem istehsalının strateji əhəmiyyətə malik olduğunu diqqətə çatdırıb. Hazırda bu tip məhsulların Azərbaycana digər ölkələrdən idxal edildiyini söyləyən Emil Əhmədov layihə çərçivəsində istehsal ediləcək yüksəkkeyfiyyətli məhsulların daxili bazara satışı, eləcə də xarici ölkələrə ixracının nəzərdə tutulduğunu qeyd edib.

O, bu kimi yüksək səviyyədə təşkil olunan sərgilərin Azərbaycanda mövcud şirkətlərin beynəlxalq arenaya inteqrasiyası üçün böyük imkanlar açdığını deyib. İcraçı direktor müəssisənin istehsal etdiyi məhsulların “TEKNOFEST Azərbaycan” festivalının iştirakçılarında böyük maraq doğuracağına və bir sıra xarici partnyorlarla əməkdaşlıq əlaqələrinin qurulmasına təkan verəcəyinə ümidvar olduğunu bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.