SİYASƏT
BİR MİLYONDAN YUXARI QAÇQIN VƏ MƏCBURİ KÖÇKÜNÜN RESPUBLİKA İCTİMAİYYƏTİNƏ MÜRACİƏTİ
DÖVLƏT QAÇQINKOMDAN AzərTAc-a DAXİL OLMUŞ BU MÜRACİƏTDƏ ON MİNLƏRLƏ QAÇQIN VƏ MƏCBURİ KÖÇKÜN SOYDAŞLARIMIZIN HƏMİN QURUMUN MƏTBUAT XİDMƏTİNƏ GÖNDƏRDİYİ MƏKTUB VƏ MÜRACİƏTLƏRİN ÜMUMİ MƏZMUNU İFADƏ EDİLMİŞDİR
Son günlər Müsavat Partiyası və onun dezinformasiya daşıyıcısı olan “Yeni Müsavat” qəzetinin Azərbaycan xalqının tarixi adət-ənənəsinə, milli- mənəvi, dini və əxlaqi dəyərlərinə, habelə insanlıq ləyaqətinə yaraşmayan, ifrat dərəcədə çirkin əməlləri bir milyondan çox qaçqın və məcburi köçkünün nifrət və qəzəbinə səbəb olmuşdur.
Biz - qaçqın və məcburi köçkünlər ölkəmizin Prezidenti Heydər Əliyevin sağlamlıq durumu ilə əlaqədar “Yeni Müsavat” qəzetində dərc olunmuş, insan ləyaqətinə və mənəviyyatına, xalqımızın ağsaqqala hörmət ənənələrinə uyğun gəlməyən və heç bir etik normaya sığmayan silsilə yazıları, ən azı həmin qəzetin baş redaktoru və əməkdaşlarının insanlığa xas olmayan hərəkətləri kimi qiymətləndiririk.
Müsavat Partiyası başqanının çağırışlarına və “Yeni Müsavat” qəzetinin yazılarına diqqətlə nəzər yetirsək, onların hakimiyyəti qeyri-demokratik yolla, hətta zorla ələ keçirmək niyyətlərinin şahidi olarıq. Respublikamızda çox çətinliklə əldə olunmuş siyasi sabitliyi, demokratik və iqtisadi inkişafı gözü götürməyən bu qüvvələrin niyyətlərinin tarixi düşmənlərimizin alçaq, xəbis niyyətləri ilə üst-üstə düşdüyü bir daha təsdiqlənir. Artıq bütün Azərbaycan ictimaiyyətinə bəllidir ki, Müsavat Partiyası və “Yeni Müsavat” qəzeti ölkənin müxalifət qurumu yox, dövlətə, millətə, xalqa xəyanət yolunu tutmuş, düşmən kəsilmiş partiya və qəzetdir.
Bütün əxlaqi dəyərlərdən və insani keyfiyyətlərdən kənar olan həmin qüvvələrin özbaşınalığına biz qaçqın və məcburi köçkünlər biganə qalıb, bu proseslərə göz yuma bilmərik. Çünki on ildən artıqdır ki, çadır düşərgələrində dözülməz şəraitdə yaşamağımız ölkəmizin Prezidentinə olan ümid və inamımızla bağlıdır. Əminik ki, yalnız Prezident Heydər Əliyev işğal altında olan torpaqlarımızı istənilən yolla azad edəcək və bizi öz dədə-baba ocaqlarımıza qaytaracaqdır.
Ölkəmizin Prezidenti Heydər Əliyevin həmişəki kimi, bu gün də güclü sosial dayağı və mənəvi arxası olan biz qaçqın və məcburi köçkünlər respublika ictimaiyyətinə və müvafiq dövlət qurumlarına müraciət edərək, milli-mənəvi dəyərlərimizə zərbə vurmağa çalışan, yolunu azmış bu qüvvələrin əməllərinə biganə qalmamağa çağırır və dövlətimizin başçısının ünvanına söylənilən ifadələrdə cinayyət xarakterli əməllərin olduğunu qeyd edərək, onlara qarşı qanun çərçivəsində müvafiq tədbir görülməsini və lazım gələrsə “Yeni Müsavat” qəzetinin fəaliyyətinin dayandırılmasını aidiyyatı orqanlardan tələb edirik.
Bütün bu deyilənlərlə yanaşı, biz-bir milyondan çox qaçqın və məcburi köçkün bir daha bəyan edirik ki, qarşıdan gələn növbəti prezident seçkilərində Azərbaycan dövlətçiliyinin qarantı olan dünya şöhrətli müdrik siyasətçi, ölkəmizin Prezidenti Heydər Əliyevin namizədliyinə yekdilliklə səs verəcəyik.