Bakı, 24 oktyabr, Səadət Hakıyeva, AZƏRTAC

XX əsrin tarixinə ən faciəli hadisələrdən biri kimi daxil olan Dağlıq Qarabağ münaqişəsi və onun acı nəticələri milyonlarla insanımızın taleyinə ciddi təsir göstərib. Ermənistan tərəfinin 1988-ci ildə Azərbaycana qarşı açıq şəkildə ərazi iddiaları və etnik təmizləmə zəminində törətdiyi təxribatlarının sonu işğalçının ölkəmizə qarşı hərbi təcavüzü ilə nəticələnib.

Xatırlatmaq yerinə düşər ki, azərbaycanlılar 1905-1906-cı, 1918-1920-ci, 1948-1953-cü illərdə də indiki Ermənistan ərazisindən məqsədyönlü şəkildə didərgin salınıb və deportasiya ediliblər. Təkcə 1948-1953-cü illərdə 150 mindən çox azərbaycanlı Ermənistan SSR ərazisindəki tarixi yurdlarından kütləvi surətdə və zorakılıqla sürgün olunub. Bu zaman minlərlə insan, o cümlədən qocalar və körpələr ağır köçürülmə şəraitinə, fiziki sarsıntılara və mənəvi iztirablara dözməyərək həlak olub. Erməni diasporu hər zaman münaqişənin dinamikasına təsir etməklə yanaşı, fəaliyyət göstərdiyi ölkələrdə təbliğat işi aparır, müxtəlif dövlətləri münaqişənin öz maraqlarına uyğun həllinə yönəltməyə çalışırdı. Son hadisələrdə də erməni diasporu anti-Azərbaycan siyasətini davam etdirdiyini sübuta yetirdi. Lakin artıq dünya mediası və insanları ermənilərin yalanlarına inanmır. Erməni diasporunun bəzi KİV nümayəndələrinə güclü təsiri danılmaz faktdır.

Bu fikirləri AZƏRTAC-a açıqlamasında Milli Məclisin deputatı Müşfiq Cəfərov deyib.

Deputat bildirib ki, hələ ötən əsrin 90-cı illərində Ermənistanın qərarları münaqişənin təcavüzkar mahiyyətini açıq-aydın nümayiş etdirirdi. Azərbaycana qarşı ərazi iddiaları təkcə millətçi qruplar tərəfindən deyil, həm də Ermənistanın dövlət strukturları tərəfindən irəli sürülürdü. Ermənistan nəyin bahasına olursa-olsun Azərbaycan ərazisinin bir hissəsini qopartmaq istəyirdi. “1990-cı ilin mayında Ermənistanda keçirilən parlament seçkilərində mahiyyət etibarilə bu ölkədə müharibəni təbliğ edən ifrat millətçi və şovinist qüvvələr hakimiyyətə gəldilər. Bu isə onların təcavüzkar müharibəyə başlaması prosesini daha da sürətləndirdi. Rəsmi Yerevan bütün səylərini qeyri-rəsmi hərbi birləşmələrin yaradılmasına və onların silahlandırılmasına yönəldib. Düşmən ölkə münaqişənin ilk vaxtlarında hərbi üstünlüyə malik olub və problemi öz müharibə məqsədlərinə uyğun olaraq güc yolu ilə həll etməyə üstünlük verib. Ona görə də danışıqlar prosesinə heç vaxt ciddi yanaşmayıb və onlardan yalnız beynəlxalq ictimai rəydə görüntü yaratmaq məqsədilə yararlanıb. Hazırda isə Azərbaycanın hərbi üstünlüyündən, cəbhədəki uğurlarından qorxan erməni hakimiyyəti danışıqlar üçün müxtəlif ölkə rəhbərliklərinə müraciət edir. Azərbaycan müharibənin gedişatını dəyişən tərəf olsa da, sülhə maraqlıdır. Bizim üçün regionun sabitliyi vacibdir”.

Müşfiq Cəfərovun sözlərinə görə, istər münaqişənin müharibə ərəfəsi mərhələsində, istərsə də sonrakı dövrdə Azərbaycanın mövqeyi ölkə Konstitusiyası və beynəlxalq hüquq normaları baxımından tam ədalətli idi. Hərbi münaqişə dövründə erməni ordusu hərbi və mülki şəxslər arasında heç bir fərq qoymadan işğal etdikləri rayon və şəhərlərdə dinc azərbaycanlı əhalini amansızlıqla qətlə yetirib. Azərbaycanlılar həm etnik təmizləməyə, həm də əsl soyqırımına məruz qalıblar. Hazırda Ermənistan silahlı qüvvələri beynəlxalq humanitar hüququn bütün prinsip və normalarına zidd olaraq, mülki əhalini məqsədyönlü şəkildə əsas hədəf kimi seçib.

Deputat bildirib ki, Dağlıq Qarabağ münaqişəsi nəticəsində 1 milyondan çox azərbaycanlı məcburi köçkün vəziyyətinə düşüb, 20 min nəfər hərbi əməliyyatlar dövründə həyatını itirib, 50 min nəfər əlil olub. Münaqişə nəticəsində 4 minə yaxın azərbaycanlı itkin düşüb, onların arasında 67 uşaq, 265 qadın və 326 qoca olub. Bu şəxslərin aqibəti barədə hələ də məlumat yoxdur. İki mindən çox azərbaycanlı ermənilər tərəfindən əsir və girov götürülüb. “Dövlətlərarası xarakterinə görə beynəlxalq sülh və təhlükəsizlik üçün ciddi təhdid mənbəyinə çevrilən münaqişə beynəlxalq təşkilatlar çərçivəsində ciddi müzakirələrə səbəb olub, problemlə bağlı bir sıra mühüm sənədlər qəbul olunub. Lakin bu sənədlərdən heç biri icra olunmayıb. Hazırda BMT-nin münaqişə ilə əlaqədar qəbul etdiyi və kağız üzərində qalan 4 qətnaməsini Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu yerinə yetirir. Qarabağ Azərbaycandır!”, - deyə M.Cəfərov vurğulayıb.