DÜNYA
BMT-nin xüsusi məruzəçisi Kaşıkçının qətlini təhqiq etmək üçün Türkiyəyə gedəcək
Bakı, 25 yanvar, AZƏRTAC
BMT-nin məhkəmədənkənar edamlar məsələsi üzrə xüsusi məruzəçisi Anes Kalamar səudiyyəli jurnalist Camal Kaşıkçının qətli ilə bağlı təhqiqat aparmaq üçün yanvarın 28-dən fevralın 3-dək Türkiyədə səfərdə olacaq.
AZƏRTAC TASS informasiya agentliyinə istinadla xəbər verir ki, bu barədə Cenevrədə BMT-nin insan hüquqları üzrə Ali Komissarının İdarəsi məlumat yayıb. Məlumatda Anes Kalamarın jurnalist Camal Kaşıkçının öldürülməsi ilə əlaqədar beynəlxalq təhqiqata rəhbərlik edəcəyi qeyd olunur.
Qurumdan bildirilib ki, təhqiqat Kalamarın xahişi və məhkəmədənkənar edamlar məsələsi üzrə xüsusi məruzəçisinin mandatı çərçivəsində aparılacaq. Araşdırmanın gedişində “Kaşıkçının qətlinin təfərrüatlarının insan haqları nöqteyi-nəzərindən qiymətləndiriləcəyi ehtimal olunur. Ekspert qətlə cavab olaraq “hökumətlərin atdığı addımları”, həmçinin dövlətlərin və fərdlərin məsuliyyət dərəcələrini təhlil edəcək.
Kalamarın sözlərinə görə, təhqiqat, həm də “dövlətlər tərəfindən yaşamaq hüquqlarının qorunması, qanun pozuntularının qarşısının alınması və məsuliyyətin təmin olunması üzrə beynəlxalq öhdəliklərin yerinə yetirilməsi üçün səyləri artırmaq yollarının müəyyən edilməsinə” yönəlib. Xüsusi məruzəçi 2019-cu ilin iyun ayında təhqiqatın nəticələri barədə BMT-nin insan hüquqları şurasına məruzə edəcək.
Xatırladaq ki, Camal Kaşıkçı oktyabrın 2-də sənədləşmə ilə bağlı Səudiyyə Ərəbistanının İstanbuldakı Baş konsulluğuna gəlmiş və həmin vaxtdan itkin düşmüşdü. Səudiyyə Ərəbistanının baş prokurorluğu əvvəlcə jurnalistin diplomatik missiyada yaranmış mübahisə nəticəsində öldüyünü bildirsə də, sonradan cinayətin planlı şəkildə törədildiyini, cəsədin isə hissələrə bölünərək diplomatik kompleksdən çıxarıldığını etiraf etmişdi.