SİYASƏT


BOLQARISTANLI MÜŞAHİDƏÇİLƏR SEÇKİLƏRƏ HAZIRLIQDAN RAZIDIRLAR

Prezident seçkilərini müşahidə etmək məqsədi ilə ölkəmizdə səfərdə olan Bolqarıstan deputatları oktyabrın 14-də Şəhidlər xiyabanını ziyarət etmişlər. Onlar Azərbaycanın ərazi bütövlüyü uğrunda canlarından keçmiş qəhrəmanların məzarları üstünə gül-çiçək dəstələri düzmüş, Əbədi məşəl xatirə kompleksi önündə şəhidlərin xatirəsini bir dəqiqəlik sükutla yad etmişlər. Qonaqlar buradan Bakının mənzərəsini seyr etdikdən sonra Milli Məclisin sədri Murtuz Ələsgərovla görüşmüşlər.

Parlamentin sədri Murtuz Ələsgərov demişdir ki, Azərbaycanda seçkilərin ədalətli və demokratik keçirilməsi üçün lazımi qanunvericilik bazası yaradılmış, beynəlxalq standartlara cavab verən Seçki Məcəlləsi qəbul edilmişdir.

Milli Məclisin sədri Ermənistan-Azərbaycan, Dağlıq Qarabağ münaqişəsi ilə bağlı ətraflı məlumat vermişdir. O demişdir ki, BMT TŞ məsələ ilə bağlı 4 qətnamə qəbul etsə də, ermənilər işğal etdikləri ərazilərdən çıxmaq istəmirlər. Azərbaycan bu ağrılı problemin sülh yolu ilə həllinə tərəfdardır. Əgər danışıqlar bir nəticə verməsə biz başqa vasitələrə əl atacağıq.

Sonra sədr Azərbaycan-Bolqarıstan parlament əlaqələrindən danışmış və bu sahənin inkişaf perspektivlərini yüksək qiymətləndirmişdir.

Murtuz Ələsgərov Bolqarıstan parlamentinin sədrini Azərbaycana səfərə dəvət etmişdir.

Nümayəndə heyətinin rəhbəri Yordan Dimov Azərbaycanda keçirdikləri müşahidələr zamanı prezidentliyə namizədlərə ayrı-seçkilik qoyulmadığının şahidi olduqlarını, əhalinin yüksək əhval-ruhiyyəsini xüsusi qeyd etmişdir.

Bolqarıstanlı deputatlar Dağlıq Qarabağ problemində təmsil etdikləri ölkənin Azərbaycanın ərazi bütövlüyünü dəstəklədiyini bildirdilər. Sonra onlar parlament səviyyəsində, neft, turizm sahələrində əməkdaşlıq üçün yaxşı imkanların olduğunu qeyd etmişlər.

Görüşdə Milli Məclisin deputatı Vaqif Abdullayev və Bolqarıstanın ölkəmizdəki müvəqqəti işlər vəkili İvan Palçev iştirak etmişlər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.