Bakı, 28 iyul, AZƏRTAC 

Bakı Şəhər Baş Polis İdarəsi (BŞBPİ) bəzi xəbər saytlarında “22-ci bölmənin qarşısında polis zorakılığı” sərlövhəsi ilə videogörüntülərin yayılmasına münasibət bildirib.

BŞBPİ-nin mətbuat xidmətindən AZƏRTAC-a verilən məlumatda həmin videogörüntülərin tam və hərtərəfli araşdırıldığı, hər hansı zorakılıq, yaxud digər qanundankənar faktın təsdiqini tapmadığı qeyd olunub.

Məlumat verilib ki, iyulun 27-də paytaxtın Nəsimi rayonu ərazisində Fizuli və Rəşid Behbudov küçələrinin kəsişməsində nəzarət-profilaktik tədbirləri həyata keçirən polis əməkdaşları hərəkət edən üç nəfərin sənədlərini təqdim etməsini tələb ediblər. Onlardan birinin icazəsi olmasına baxmayaraq, digər iki nəfər polisin qanunu tələblərinə məhəl qoymayaraq, tabesizlik göstərməklə, asayiş keşikçilərinin ünvanlarına nalayiq ifadələr işlədiblər.

Keçirilən tədbirlərlə şəxsiyyətləri müəyyənləşdirilən 1996-cı il təvəllüdlü A.Dadaşov, 1984-cü il təvəllüdlü S.Məstanova saxlanılaraq müvafiq polis bölməsinə dəvət olunublar. Qanunvericiliyə uyğun olaraq, İnzibati Xətalar Məcəlləsinin 211-ci (Epidemiya əleyhinə rejimin, sanitariya-gigiyena və karantin rejimlərinin pozulmas) və 535-ci (Polis işçisinin və ya hərbi qulluqçunun qanuni tələbinə qəsdən tabe olmama) maddələri ilə onların barələrində protokollar tərtib edilərək, baxılması üçün rayon məhkəməsinə göndərilib.