ELM VƏ TƏHSİL


Bakı Ali Neft Məktəbi və Yuqorsk Dövlət Universiteti arasında əməkdaşlıq müzakirə olunub

Bakı, 11 oktyabr, AZƏRTAC

Bakı Ali Neft Məktəbinin (BANM) rektoru Elmar Qasımov Rusiyanın Xantı-Mansiysk muxtar dairəsində yerləşən Yuqorsk Dövlət Universitetinin nümayəndə heyəti ilə görüşüb.

BANM-dən AZƏRTAC-a bildirilib ki, rektor Tatyana Karminskayanın rəhbərlik etdiyi nümayəndə heyətinə sözügedən universitetin gənclər siyasəti və xarici əlaqələr üzrə prorektoru Anna Brovina, tədris işləri üzrə prorektor müşaviri Roman Şamileviç və başqaları daxil olub.

Görüşdə tərəflər arasında təcrübə mübadiləsi, məqsədyönlü əməkdaşlıq proqramları vasitəsilə elmi-pedaqoji qruplar və tələbə mübadiləsi, birgə elmi tədqiqatlar aparılması, elmi-texniki və metodik layihələrin hazırlanması və s. məsələlər müzakirə olunub.

Rektor Elmar Qasımov Azərbaycanla Rusiya arasında bütün sahələrdə dostluq əlaqələrinin olduğunu, BANM-in Rusiyanın, eləcə də dünyanın bir sıra ali təhsil müəssisələri ilə səmərəli əməkdaşlıq etdiyini bildirib. Ali məktəbdə beynəlxalq tədris proqramlarına əsasən tədris aparıldığını qeyd edən rektor Böyük Britaniyanın Heriot-Vatt, ABŞ-ın Corc Vaşinqton Universiteti, İsveçrənin Cenevrə Biznes Məktəbi ilə sıx əməkdaşlıq edildiyini, tələbə və təcrübə mübadiləsi həyata keçirildiyini bildirib. E.Qasımov ali məktəbin tarixi, fəaliyyət istiqamətləri, yeniliklər, professor-müəllim heyəti, eyni zamanda tələbələrin uğurları haqda da qonaqlara ətraflı məlumat verib.

O, həmçinin Azərbaycan Respublikası Prezidentinin Sərəncamına əsasən bu il Bakı Ali Neft Məktəbinin yüksək bal toplayan 23 tələbəsinin Prezident təqaüdünə layiq görüldüyünü diqqətə çatdırıb.

Rektor Yuqorsk Dövlət Universiteti ilə qarşılıqlı əlaqələrin bundan sonra daha da genişlənəcəyinə əminliyini ifadə edib.

Yuqorsk Dövlət Universitetinin rektoru Tatyana Karminskaya səmimi qəbul üçün təşəkkür edərək ikitərəfli əlaqələrin inkişaf etdirilməsində maraqlı olduqlarını bildirib. Eyni zamanda perspektivdə birgə tələbə-müəllim mübadiləsini, tədqiqatların aparılmasını zəruri hesab etdiyini vurğulayıb.

“İnnovasiyaların tətbiqi əsas prioritet olan universitetimiz Rusiya Federasiyası Hökumətinin əmri ilə 2001-ci ildə yaradılıb. Hazırda Yuqorsk Rusiyanın ən gənc dövlət universitetlərindən biridir. Əsas vəzifəmiz bölgədəki yüksək texnologiyalar sahələrinin mürəkkəb problemlərini həll etmək üçün təhsil və tədqiqatların aparılmasıdır. Universitetimiz hər il 2 mindən çox mütəxəssis yetişdirir”,- deyə T.Karminskaya məlumat verib.

Görüşdə təhsil və elm sahələri üzrə qarşılıqlı fəaliyyətə dair Əməkdaşlıq Sazişinin imzalanması qərara alınıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.