ELM VƏ TƏHSİL


Bakı Ali Neft Məktəbini beynəlxalq müsabiqələrdə uğurla təmsil edən tələbələr təltif olunublar

Bakı, 5 fevral, AZƏRTAC

Bakı Ali Neft Məktəbində (BANM) Gənclər Günü münasibətilə tədbir keçirilib. Əvvəlcə Azərbaycan Respublikasının dövlət himni səsləndirilib.

BANM-dən AZƏRTAC-a bildirilib ki, tədbirdə çıxış edən rektor Elmar Qasımov dövlət gənclər siyasətinin əsasının ümummilli lider Heydər Əliyev tərəfindən qoyulduğunu bildirib. Diqqətə çatdırıb ki, Ulu Öndərin 1997-ci il 2 fevral tarixli Fərmanına əsasən Azərbaycan Gəncləri Günü təsis edilib və həmin vaxtdan etibarən hər il bu əlamətdar gün ölkədə qeyd olunur.

Rektor Elmar Qasımov vurğulayıb ki, Prezident İlham Əliyevin dövlət gənclər siyasətinə verdiyi önəm və gənclərə qayğısı nəticəsində bu sahədə dövlət proqramları həyata keçirilir, bölgələrdə Gənclər Mərkəzi yaradılır, gənclərin dünyaya inteqrasiya etməsinə, təhsilinə, sosial-ictimai fəaliyyətinə hər zaman xüsusi dəstək verilir. “Dövlətimizin ənənələrinə sadiq qalaraq BANM də hər il bu günü böyük auditoriya ilə qeyd edir”, - deyə rektor Elmar Qasımov bildirib.

Tədbirdə Prezident Administrasiyasının humanitar siyasət məsələləri şöbəsinin müdir müavini Məhərrəm Əhmədov, Azərbaycan Respublikasının Gənclər Fondunun icraçı direktoru Fərid Cəfərov, Yeni Azərbaycan Partiyasının Gənclər Birliyinin sədri Seymur Orucov çıxış edərək gəncləri ölkəmizin inkişafı naminə sosial-ictimai sahələrdə fəal iştirak etməyə səsləyiblər.

Rektor Elmar Qasımov ali məktəbin inkişafına verdiyi töhfələrə görə Prezident Administrasiyasının humanitar siyasət məsələləri şöbəsinin müdir müavini Məhərrəm Əhmədova və ali məktəbin tələbələrinin elmi-sosial inkişafına verdiyi töhfələrə görə Azərbaycan Gənclər Fondunun icraçı direktoru Fərid Cəfərova BANM-in fəxri diplomlarını təqdim edib.

Bakı Ali Neft Məktəbinin məzunları adından 2018-ci il neft-qaz mühəndisliyi ixtisasının məzunu, BP-də ətraf mühit əməliyyatları üzrə mühəndis Mehriban Əliyeva çıxış edərək öz uğur hekayəsini bölüşüb.

Tədbir çərçivəsində, həmçinin “İlin ixtirası” adına layiq görülən “Cleantech” (təmiz texnologiya) startup akselerasiya proqramı - “ClimateLaunchpad”ın Azərbaycan üzrə qalibi olmuş, Şotlandiyanın Edinburq şəhərində Azərbaycanı təmsil etmiş və Respublika İnnovasiya Müsabiqəsində 1-ci yer tutan “ThermoNorth” layihəsinin rəhbəri və üzvləri təltif olunublar. BANM-in dosenti Əmir Rza Vəxşuriyə diplom, komanda üzvlərinə – BANM-in tələbələrinə isə sertifikatlar təqdim olunub.

Habelə Gənclər və İdman Nazirliyi və Azərbaycan Robototexnika Mühəndisliyi Akademiyasının təşkilatçılığı ilə Dünya Robot Olimpiadasının seçim turlarında BANM-i uğurla təmsil edərək 1, 2, 3, 4-cü yerləri qazanmış və ölkəmizi Tailandda keçirilən Dünya Robot Olimpiadasında təmsil edən BANM-in “Robo Sapiens” komandasının rəhbəri, ali məktəbin baş müəllimi Abbas Əlili diplom, komanda üzvləri - tələbələr isə sertifikatlarla təltif olunublar.

Rektor Elmar Qasımov kimya mühəndisliyi ixtisasının 5-ci kurs tələbəsi Anar Bədəlbəylini ictimai, sosial işlərdə fəallığı, nümunəvi davranışı və Ali Neft Məktəbin fəaliyyətində aktiv iştirakına görə “İlin tələbəsi” elan edib və onu diplomla təltif edib.

Bundan başqa, “CanSat Azerbaijan – 2018” müsabiqəsində Azərbaycan üzrə 2-ci yeri tutmuş, Gənclər və İdman Nazirliyinin “İdeya var” gənclərin ümumrespublika elmi-yaradıcılıq festivalında “İlin layihəsi” adını qazanmış “İstehsalat sularından litiumun ayrılması” layihəsinin üzvləri, eləcə də il ərzində ölkənin və ali məktəbin sosial həyatında aktiv iştirak etmiş, uğur qazanmış tələbələr sertifikatlar və mükafatlarla təltif olunublar.

Tədbir bədii konsert proqramı ilə yekunlaşıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.