İQTİSADİYYAT
Bakı Ali Neft Məktəbinin məzunlarının bəziləri “Azneft” İB-də işə qəbul olunub
Bakı, 25 sentyabr, AZƏRTAC
Bakı Ali Neft Məktəbinin (BANM) ilk məzunlarının bir qismi “Azneft“ İstehsalat Birliyində (İB) işə qəbul edilib.
Birlikdən AZƏRTAC-a bildirilib ki, Bakı Ali Neft Məktəbinin ilk məzunlarının bir qisminin qəbulu ilə bağlı məzunlarla görüş keçirilib. Görüşdə SOCAR-ın yataqların işlənməsi üzrə vitse-prezidenti Yaşar Lətifov, SOCAR-ın geologiya və geofizika məsələləri üzrə vitse-prezidenti Bəhram Hüseynov, “Azneft” İstehsalat Birliyinin baş direktoru Daşqın İskəndərov, BANM-in rektoru Elmar Qasımov, birliyin rəhbərliyi, idarə və şöbə rəhbərləri, Bakı Ali Neft Məktəbinin məzunları iştirak ediblər.
“Azneft”in baş direktoru Daşqın İskəndərov birlik haqqında məlumat verib, qurumun son illər ərzində qazandığı uğurlardan bəhs edərək gənclərlə bağlı həyata keçirilən layihələrdən danışıb. O, insan resurslarının gəncləşdirilməsinin “Azneft” İstehsalat Birliyində prioritet məsələlərdən olduğunu qeyd edərək gənc nəslin keyfiyyətli, beynəlxalq standartlara uyğun təhsil almasını, peşəkar kadrların hazırlanması istiqamətində şirkətdə mühüm layihələrin həyata keçirildiyini vurğulayıb.
Bakı Ali Neft Məktəbinin rektoru Elmar Qasımov əsası ümummilli lider Heydər Əliyev tərəfindən qoyulmuş dövlət gənclər siyasətinin Prezident İlham Əliyev tərəfindən uğurla davam etdirildiyi bildirib. Qeyd edib ki, neftçi azərbaycanlıların milli peşəsidir, Azərbaycan bütün dünyada neft sənayesində bütün ilklərə imza atmış ölkədir. E.Qasımov vurğulayıb ki, dövlətimizin həyata keçirdiyi yüksəkixtisaslı milli kadrların yetişdirilməsi sahəsində böyük uğurlar əldə olunub.
Rektor respublikamızda istər milli, istər transmilli şirkətlərdə çalışanların əksəriyyətinin milli kadrlar olduğunu xüsusi diqqətə çatdırıb: “Hazırda, ölkəmizdə yüksək elmi-texniki biliklərə malik kadrların yetişdirilməsi, gənclərin intellektual səviyyəsinin artırılması, məntiqi təfəkkürünün inkişafı, müasir düşüncə tərzi və dünyagörüşünün formalaşdırılması istiqamətində kompleks tədbirlər həyata keçirilir. Bu mənada Prezident İlham Əliyevin Fərmanı ilə SOCAR-ın strukturunda yaradılmış Bakı Ali Neft Məktəbinin rolunu xüsusi vurğulamaq istəyirəm. Bu Ali Təhsil Ocağı beynəlxalq layihələrdə işləyə biləcək ingilis dilli, müasir biliklərə yiyələnmiş, yüksəkixtisaslı mütəxəssislər hazırlayır. Təsadüfi deyil ki, BANM tələbə qəbulu prosesinin nəticələrinə görə Dövlət İmtahan Mərkəzinin tərtib etdiyi reytinq cədvəlində hər il liderliyini qoruyur. Bu il məktəbin ilk 102 məzunu iş həyatına vəsiqə qazandı”.
Görüşdə SOCAR-ın yataqların işlənməsi üzrə vitse-prezidenti Yaşar Lətifov məzunları “Azneft” İB-də işlə təmin olunmaları münasibətilə təbrik edərək bildirib ki, SOCAR Azərbaycan tərəfini inamla təmsil edərək bütün beynəlxalq layihələrdə aktiv iştirak edir: “Sizi gənc mühəndisləri “Azneft” İB sıralarına qəbul edir, amma, bu gənc mütəxəssis demək deyil. Siz potensialınızı daha da artırıb mütəxəssis olmaq üçün neft peşəsinin bütün mərhələlərindən keçməlisiniz. Özünüz üçün proqramlar tərtib edib inkişaf etməyiniz üçün səylə çalışmalısınız”.
SOCAR-ın geologiya və geofizika məsələləri üzrə vitse-prezidenti Bəhram Hüseynov gənclərin yeni mərhələyə - iş həyatına atılmaları münasibətilə təbrik edərək öz tövsiyələrini gənclərə çatdırıb. SOCAR-ın geologiya və geofizika məsələləri üzrə vitse-prezident Bəhram Hüseynov bildirib ki, bu mütəxəssislər “Azneft” İB-də öz işgüzarlıqları sayəsində işləyəcək. B.Hüseynov gənc mühəndisləri kollektivə uyğunlaşmağı, daima üzərlərində işləməyi tövsiyə edib.
Sonra “Azneft”in kadrlar şöbəsinin rəisi Pərviz Qasımov, xaricdə təhsil almış, hazırda, İB-də çalışan Pərviz Əhmədov, “Azneft” İB-nin SOCAR-ın xarici təqaüd proqramı çərçivəsində təhsil alan əməkdaşı Fərid Abadlı, Bakı Ali Neft Məktəbinin məzunlarından Aytəkin Qasımova, Roman Rəhimli çıxış edərək öz təəssüratlarını bölüşüblər.
Sonda işə qəbul olunan Bakı Ali Neft Məktəbinin məzunlarına iş vəsiqələri təqdim olunub.