ELM VƏ TƏHSİL


Bakı Ali Neft Məktəbinin tələbələri Robot Olimpiadasında ilk üç yerin qalibi olublar

Bakı, 9 oktyabr, AZƏRTAC

Bakı Ali Neft Məktəbinin (BANM) tələbələri Dünya Robot Olimpiadasında (World Robotics Olympiad) I, II və III yerlərə layiq görülüblər. Azərbaycanın ikinci dəfə iştirak etdiyi bu Olimpiadanın regional turu Azərbaycan Gənclər və İdman Nazirliyinin və Azərbaycan Robotexnika və Mühəndislik Akademiyasının (AREA) təşkilatçılığı ilə keçirilib.

Ali Neft Məktəbindən AZƏRTAC-a bildirilib ki, yarışda “Open” və “Regular” olmaqla 2 kateqoriya və müxtəlif yaş qrupları üzrə 50-dən çox komanda iştirak edib. BANM-in tələbələri Senior Open (yaşca daha yuxarı iştirakçılar) kateqoriyasında yaratdıqları kreativ robotları ilə öz qüvvələrini sınayıb və ilk 3 yeri qazanıblar. Ali Neft Məktəbinin “Robo-Sapiens” adlı komandası Robot Olimpiadasında I yerə layiq görülərək, Tailandda keçiriləcək final mərhələsinə vəsiqə qazanıb. Komandada BANM-in “Proseslərin avtomatlaşdırılması mühəndisliyi” ixtisası üzrə II kurs tələbələri Xalidə Əliyeva, Eyvaz Nəcəfli, Ramil Abbaszadə və onların mentorları – III kurs eyniadlı ixtisasın tələbələri Fərid Həmidov və Nəriman Tağızadə yer tutublar. BANM-in proseslərin avtomatlaşdırılması mühəndisliyi kafedrasının müdiri Manafəddin Namazov və “Hər şeydə internet” laboratoriyasının rəhbəri, baş müəllim Abbas Əlili isə tələbələrə baş mentorluq ediblər.

BANM tələbələrinin “İcarus” və “RoboMonster” adlı komandaları isə II və III yeri əldə edərək, sertifikat və müxtəlif hədiyyələrlə mükafatlandırılıblar.

“Bu uğurumuzda əsas səbəb iştirakçıların əzmkar çalışqanlığı, mentorların iştirakçılara unikal metodu öyrətməsi, müəllimlərin və rəhbərliyin maddi və mənəvi olaraq hər zaman tələbələrə lazımi dəstəyi göstərmələridir”, - deyə Ali Neft Məktəbinin komandalarının baş mentoru Nəriman Tağızadə bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.