ELM VƏ TƏHSİL


Bakı Dövlət Universiteti BMT-nin Ərzaq və Kənd Təsərrüfatı Təşkilatı ilə tərəfdaşlıq edəcək

Bakı, 11 noyabr, AZƏRTAC

Bakı Dövlət Universiteti (BDU) ilə BMT-nin Ərzaq və Kənd Təsərrüfatı Təşkilatı (FAO) arasında “Qadınların iqtisadi güclərinin artırılması yolu ilə ərzaq təhlükəsizliyi və kənd yerlərində yaşayış imkanlarının yaxşılaşdırılması - AFAQ” layihəsinin icrasında tərəfdaşlığa dair müqavilə bağlanıb.

Bu barədə AZƏRTAC-a BDU-dan məlumat verilib. Bildirilib ki, müqaviləni universitetin rektoru Elçin Babayev və FAO-nun Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak imzalayıb.

Müqavilə çərçivəsində BDU-nun Sosial elmlər və psixologiya fakültəsinin Gender və tətbiqi psixologiya kafedrası tərəfdaş qismində çıxış edəcək. Layihənin əsas məqsədi kənd təsərrüfatı istehsalı ilə məşğul olan qadınlara dəstək göstərilməsi və onların bu sahədə maarifləndirilməsi üzrə təlimlərin keçirilməsidir. Eyni zamanda, Azərbaycanda ilk dəfə kənd təsərrüfatı və kənd yerləri üzrə Ölkə Gender Qiymətləndirilməsinin hazırlanması nəzərdə tutulur.

Bu əməkdaşlıq ölkənin dayanıqlı inkişaf hədəflərinə çatması istiqamətində önəmli rol oynayacaq, regionların inkişafı və insan kapitalının yüksəldilməsinə töhfə verəcək. Layihə çərçivəsində FAO tərəfindən ayrılan vəsait kənd yerlərində yoxsulluğun azaldılması, inklüziv və səmərəli kənd təsərrüfatı və ərzaq sistemlərinə imkan yaratmaq, gender bərabərliyini və kənd yerlərində yaşayan qadınların iqtisadi imkanlarının genişləndirilməsini sürətləndirmək üçün sərf olunacaq. Bu isə regionlarda mövcud olan əmək potensialının daha da inkişaf etdirilməsi və qadınlar üçün kənd yerlərində məşğulluq və sahibkarlıq imkanlarının genişləndirilməsi baxımından xüsusi əhəmiyyət kəsb edir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.