Bakı Fond Birjasında istiqrazların yerləşdirilməsi üzrə hərraclar keçiriləcək

Bakı, 11 avqust (AZƏRTAC). Avqustun 12-də Bakı Fond Birjasında (BFB) qısamüddətli və geri çağırılmaq hüququna malik birillik dövlət istiqrazlarının yerləşdirilməsi üzrə hərraclar keçiriləcək.

BFB-dən AZƏRTAC-a daxil olan məlumata görə, qısamüddətli istiqrazlar üzrə yerləşdiriləcək qiymətli kağızın ümumi həcmi 4 milyon manat, bir istiqrazın nominal dəyəri 100 manat, tədavül müddəti 182 gün təşkil edir. İstiqrazlar 2015-ci il fevralın 10-da ödəniləcək.

Geri çağırılmaq hüququna malik birillik dövlət istiqrazları üzrə yerləşdiriləcək qiymətli kağızın ümumi həcmi isə 12 milyon manat, bir istiqrazın nominal dəyəri 100 manat, tədavül müddəti 364 gündür. İstiqrazların 2015-ci il avqustun 11-də ödənilməsi nəzərdə tutulur.

Hərrac zamanı istiqrazların 20 faizindən artıq olmamaq şərti ilə, qeyri-rəqabətli sifarişlərin qəbuluna icazə verilir.