İQTİSADİYYAT
Bakı Fond Birjasının ötən il üzrə fəaliyyətinin yekunları açıqlanıb
Bakı, 17 dekabr, AZƏRTAC
Bakı Fond Birjası (BFB) 2021-ci il üzrə fəaliyyətinin yekunlarına dair məlumat açıqlayıb.
BFB-dən AZƏRTAC-a bildirilib ki, qiymətli kağızlar bazarının stabil inkişafının təmin edilməsi və korporativ qiymətli kağızlar seqmentinin canlandırılması məqsədilə Bakı Fond Birjası tərəfindən 2021-2023-cü illər üzrə müəyyən edilmiş strateji prioritetlərə uyğun olaraq listinqin stimullaşdırılması, yeni emitentlərin listinqə cəlb edilməsi, beynəlxalq təcrübəyə uyğun hüquqi çərçivənin formalaşdırılması və biznes prosedurların optimizasiyası üzrə işlər davam etdirilib. Ötən ildə özəl sektorun kapital bazarından maliyyələşmə təşəbbüslərinin və fond birjasında listinqinin təşviqi məqsədilə Bakı Fond Birjasının listinq tələbləri sadələşdirilib və kapital bazarında Azərbaycan Respublikasının Mərkəzi Bankı tərəfindən müəyyən edilmiş stimullaşdırıcı tarif rejiminin tətbiqinə başlanıb. Eyni zamanda, korporativ qiymətli kağızların kütləvi təklifinin stimullaşdırılması məqsədilə Bakı Fond Birjası tərəfindən anderraytinq xidməti göstərən investisiya şirkətlərinin mükafatlandırılması mexanizmi tətbiq edilib. Bu isə öz növbəsində, qiymətli kağızların kütləvi təklif üsulu ilə fond birjasında yerləşdirilməsi imkanlarına müsbət təsir göstərib.
Kapital bazarına dair maliyyə savadlılığının artırılması məqsədilə Bakı Fond Birjası müvafiq dövlət qurumları və investisiya şirkətlərinin iştirakı ilə intensiv maarifləndirmə tədbirləri təşkil edib, o cümlədən 30-a yaxın görüş, videokonfrans və seminar keçirilib. 2021-ci il ərzində ilk dəfə olaraq Mərkəzi Bank, Bakı Fond Birjası, Kiçik və Orta Biznesin İnkişafı Agentliyinin təşkilatçılığı ilə “İnvestisiya Səyahəti” layihəsinə start verilib və layihə çərçivəsində regionlarda olan biznes subyektlərinə kapital bazarının üstünlüklərinə dair ətraflı məlumat verilib. Kapital bazarının institusional inkişafı və dərinliyinin artırılması istiqamətində Mərkəzi Bank tərəfindən görülən işlər və kapital bazarı iştirakçıları ilə aparılmış aktiv dialoq tənzimlənən bazarın səmərəliliyinin artırılmasına öz töhfəsini verib. Eyni zamanda, Bakı Fond Birjasının üzvü olan investisiya şirkətləri maliyyə vasitəçiliyi rollarını inkişaf etdirməklə bazarın dinamik artım tempində mühüm rol oynayıb.
Kapital bazarının inkişafı istiqamətində görülən işlərin nəticəsi olaraq ümumi ticarət həcmində, korporativ qiymətli kağızlar bazarında və repo əməliyyatlarında Bakı Fond Birjası tarixinin ən yüksək nəticələrini əldə edib. Bakı Fond Birjasının 21 illik fəaliyyəti dövründə ilk dəfə olaraq ötən il ərzində ticarət dövriyyəsi 15 milyard manatı keçərək 15,3 milyard manat təşkil edib. Bazar kapitalizasiyasının həcmi 4,3 milyard manata yüksələrək Bakı Fond Birjasının tarixində ən yüksək göstəriciyə çatıb. Korporativ qiymətli kağızların (ipoteka istiqrazları istisna olmaqla) buraxılışı həcmində rekord göstərici qeydə alınıb və ümumi məbləği 376 milyon manat olan 33 yerləşdirmə həyata keçirilib. Müqayisə üçün qeyd etmək olar ki, 2018-2020-ci illər ərzində Bakı Fond Birjasında ümumi məbləği 350 milyon manat olan 26 korporativ qiymətli kağız (ipoteka istiqrazları istisna olmaqla) yerləşdirilib. 2021-ci il repo əməliyyatlarının həcmi üzrə 7,2 milyard manat olmaqla Bakı Fond Birjasının tarixində son illərin ən yüksək dövriyyəsi qeydə alınıb. Müqayisə olaraq, 2018-2020-ci illər ərzində bu göstərici ümumilikdə 3,8 milyard manat təşkil edib. Bakı Fond Birjasının ümumi ticarət dövriyyəsinin ÜDM-ə nisbəti 18 faizə yüksəlib.