MƏDƏNİYYƏT
Bakı, Gəncə və Qəbələ UNESCO-nun Öyrənən Şəhərlər üzrə Qlobal Şəbəkəsinə üzv seçilən ilk şəhərlərimizdir
![](/files/galleryphoto/2020/3/1200x630/16009522235700232684_1200x630.jpg)
![](/files/galleryphoto/2020/3/1200x630/16009522231993364791_1200x630.jpg)
![](/files/galleryphoto/2020/3/1200x630/16009522234534849433_1200x630.jpg)
![](/files/galleryphoto/2020/3/1200x630/1600952223255335853_1200x630.jpg)
![](/files/galleryphoto/2020/3/1200x630/1600952223313120782_1200x630.jpg)
Paris, 24 sentyabr, AZƏRTAC
UNESCO üzrə Azərbaycan Respublikasının Milli Komissiyası, Təhsil Nazirliyi, UNESCO yanında Daimi Nümayəndəliyimiz və aidiyyəti icra hakimiyyəti orqanlarının təşkilatçılığı və səyləri sayəsində sentyabrın 23-də Bakı, Gəncə və Qəbələ UNESCO-nun Həyatboyu Öyrənmə İnstitutunun aparıcı qurumu olan Öyrənən Şəhərlər üzrə Qlobal Şəbəkəyə üzv seçilib.
Bakı, Gəncə və Qəbələ UNESCO-nun aidiyyəti qurumuna üzv seçilən ilk şəhərlərimizdir.
AZƏRTAC xəbər verir ki, UNESCO-da şəbəkəyə seçilən yeni üzvlərin elan olunması ilə bağlı videogörüşdə Öyrənən Şəhərlər üzrə Qlobal Şəbəkəyə yeni daxil olan 27 ölkədən 55 şəhərin adları elan edilib.
UNESCO-nun Həyatboyu Öyrənmə İnstitutunun direktoru David Atchoarena qurumun Öyrənən Şəhərlər üzrə Qlobal Şəbəkəsinin yeni üzvlərini səmimi qəlbdən salamlayıb və hamı üçün həyatboyu öyrənməyi təmin etmək məqsədini daha da inkişaf etdirmək üçün onlarla birlikdə işləməyi səbirsizliklə gözlədiyini bildirib.
Bildirilib ki, ibtidai təhsildən ali təhsilə qədər inklüziv təhsilin təşviqi üçün bütün sektorlarda öz resurslarını effektiv səfərbər edən, ailə və icmalar nəzdində təhsili təşviq edən, məşğulluq və iş yerlərində öyrənməni asanlaşdıran, tədrisdə müasir texnikaların istifadəsini genişləndirən və həyatboyu öyrənmə mədəniyyətini təbliğ edən şəhərlər UNESCO-nun Öyrənən Şəhərlər üzrə Qlobal Şəbəkəsinə daxil olmaq üçün əsas meyarlardandır. Şəbəkəyə daxil olmaq üçün namizəd şəhərlər cəmiyyətdəki hər kəs üçün həyatboyu öyrənmə imkanlarını təmin etmək məqsədilə aydın bir baxış nümayiş etdirməlidir. İnanırıq ki, bilik və vərdişlərin yaradılması və bölüşdürülməsinə, bərabər əsaslarda öyrənmə və bacarıqların möhkəmləndirilməsinə əsaslanan beynəlxalq şəbəkəyə qoşulan Azərbaycanın üç şəhəri - Bakı, Gəncə və Qəbələ bu şəbəkədə layiqli yerlərini tutacaq və təcrübələrini digər üzv şəhərlərlə bölüşəcək.
Şəhərlərimiz qlobal şəbəkə çərçivəsində həyatboyu öyrənmə siyasət və təcrübələrdən, əsas çağırışlar və həll yollarına dair təcrübələrin inkişaf etdirilməsi və mübadiləsindən, təhsil sahəsindəki təşəbbüslərdən və regional, eləcə də beynəlxalq tədbirlərdə iştirak etmək kimi imkanlardan bəhrələnəcək.
Xatırladaq ki, UNESCO-nun Öyrənən Şəhərlər üzrə Qlobal Şəbəkəsi ilham, bacarıq və yaxşı təcrübə təmin edən siyasətə əsaslanan beynəlxalq miqyaslı şəbəkədir. İnkişaf səviyyəsindən asılı olmayaraq Öyrənən Şəhərlər digər şəhərlərlə ideya bölüşməsindən bəhrələnə bilər, çünki inkişaf yollarında üzləşdikləri və onları maraqlandıran sualların cavabları digər şəhərlərdə artıq mövcud ola bilər.
Qeyd edək ki, 2019-2021-ci illər strategiyası çərçivəsində qlobal şəbəkə fəaliyyətini 7 əsas prioritet üzərində qurub: davamlı inkişaf üçün təhsil, bərabərlik və inklüzivlik, təhsilin planlaşdırılması, monitorinqi və qiymətləndirilməsi, qlobal vətəndaşlıq üçün təhsil, sahibkarlıq, sağlamlıq və rifah, savadlılıq.
Şəhla Ağalarova
AZƏRTAC-ın xüsusi müxbiri
Paris