“Bakı” İstilik Elektrik Mərkəzində əsaslI təmir işləri aparılır

Bakı, 26 oktyabr AZƏRTAC.

“Bakı” İstilik Elektrik Mərkəzində aparılan əsaslı təmir işləri nəticəsində istehsal prosesinin dayanıqlığı daha da genişlənib və texniki–iqtisadi göstəricilər yüksəlib.

“Azərenerji” ASC-nin mətbuat xidmətindən AZƏRTAC-a bildirilib ki, stansiyada bu ilin sentyabr ayında 48,4 milyon kilovat-saatdan artıq elektrik enerjisi istehsal olunub. Ötən 9 ayda isə bu rəqəm 479,2 milyon kilovat-saat təşkil edib.

Bu dövrdə həyata keçirilmiş məqsədyönlü tədbirlər nəticəsində digər texniki-iqtisadi göstəricilər üzrə də yüksək nəticələr qazanılıb.

Qeyd edək ki, İstilik Elektrik Mərkəzində hər birinin gücü 53,5 meqavat olan iki qaz turbin qurğusu fəaliyyət göstərir.