Bakı, 13 mart, AZƏRTAC

“Bakı Beynəlxalq Dəniz Ticarət Limanı” QSC-nin Avropada Təhlükəsizlik və Əməkdaşlıq Təşkilatı (ATƏT) ilə birgə reallaşdırdığı “Xəzər dənizi regionunda yaşıl limanların və bağlılığın təşviqi” layihəsinin həyata keçirilməsi məqsədilə yaradılan işçi qrupunun növbəti iclası keçirilib.

QSC-dən AZƏRTAC-a bildirilib ki, Azərbaycanın nəqliyyat sahəsində çalışan dövlət və özəl qurumlarını özündə birləşdirən işçi qrupun üzvləri “Avstriya Federal Dəmir Yolları” SC-nin yük daşımaları üzrə törəmə şirkəti olan “Rail Cargo Group”un Müşahidə Şurasının üzvü Tomas Karqla dünya nəqliyyat dəhlizlərində şirkətin fəaliyyəti, yük axınlarının artırılması və bu müstəvidə Beynəlxalq Transxəzər Nəqliyyat Marşrutunun (Orta dəhliz) inkişaf etdirilməsi barədə fikir mübadiləsi aparıblar.

İşçi qrupun diqqətinə çatdırılıb ki, “Şərq-Qərb” istiqamətində ildə 1,5 milyon konteynerin daşınmasına ehtiyac var, Avropa və Çin arasında daşınan konteynerlərin sayı isə 600 mindir. Bu il Çin hökuməti Sian şəhərindən 150 qatarın Orta dəhlizlə Bakı Limanından keçərək Türkiyə üzərindən Avropaya nəql olunmasını planlaşdırır.

“Rail Cargo Group”un Müşahidə Şurasının üzvü T.Karql qeyd edib ki, Orta Dəhlizlə yaxın illərdə Avropadan Asiyaya və əks istiqamətdə daşınan yüklərin sayı artacaq, bu da dəhlizin daha rəqabətə dözümlü olmasını zəruri edir. Avstriya dəmir yollarının rəsmisi yaxın günlərdə Bakı Limanında malların müvəqqəti saxlanc və gömrük anbarının fəaliyyətə başlamasını Xəzər dənizi hövzəsində işləyən iri transmilli şirkətlərin maraqlarına xidmət edəcəyini də deyib.

İclasda, həmçinin qərara alınıb ki, işçi qrupunun növbəti toplantısında Avropa, Türkiyə və Qazaxıstanın aparıcı logistika və nəqliyyat şirkətləri də iştirak etsin. Qeyd olunan şirkətlərin iştirakı Azərbaycanın Avropa ilə Asiya arasında vacib logistika və paylayıcı mərkəzə çevrilməsinə, ökəmiz üzərindən keçən marşrutun rəqabətə dözümlülüyünün artırılmasına töhfə verəcək.

Tədbirin sonunda Bakı Limanı ilə “Rail Cargo Group” arasında anlaşma memorandumu imzalanıb. Sənədi Bakı Limanının baş direktoru Taleh Ziyadov və “Rail Cargo Group”un Müşahidə Şurasının üzvü Tomas Karql imzalayıblar.

T.Ziyadov qeyd edib ki, Avropa ilə Asiya arasında vacib coğrafi mövqeyə malik Bakı Limanı Avropa qitəsinin aparıcı yükdaşıma şirkətlərini Orta dəhlizə cəlb etməyə davam edir. Avstriya şirkəti ilə imzalanan memorandum Orta dəhlizin rəqabətliliyini artıracaq və Azərbaycanın Avropanın aparıcı habları ilə işləməsini təmin edəcək.

T.Karql isə bildirib ki, 2019-cu ilin oktyabrında Sian şəhərindən çıxan sınaq qatarı 18 gün ərzində Çex Respublikasına çatıb: “Bu göstərici baxımdan Orta dəhliz kifayət qədər rəqabətə dözümlüdür. “Rail Cargo Group” olaraq, 2020-ci ilin birinci yarısında Bakı Limanı ilə əldə olunmuş razılıq əsasında, artıq Venlodan (Niderland) ilk sınaq qatarını Bakı Limanından keçmək şərtilə Çinə yollayacağıq. Hesab edirik ki, Avropadan Çinə və əks istiqamətdə Orta Dəhlizlə mütəmadi olaraq yük axını təmin olunacaq.”

Həmçinin, “Xəzər dənizi regionunda yaşıl limanların və bağlılığın təşviqi” layihəsinin həyata keçirilməsi məqsədilə yaradılan işçi qrupun iclasının yekunu olaraq “Rail Cargo Group” şirkəti ilə atılacaq gələcək addımlara dair protokol qəbul edilib.