İQTİSADİYYAT


Bakı Media Mərkəzi və Qida Təhlükəsizliyi Agentliyi arasında əməkdaşlıq haqqında memorandum imzalanıb YENİLƏNİB

Bakı, 14 mart, Ramiz Quliyev, AZƏRTAC

Martın 14-də Bakı Media Mərkəzi və Azərbaycan Respublikasının Qida Təhlükəsizliyi Agentliyi arasında əməkdaşlıq haqqında memorandum imzalanıb.

AZƏRTAC xəbər verir ki, əməkdaşlıq memorandumuna əsasən tərəflər qarşılıqlı əməkdaşlıq əlaqələrini inkişaf etdirmək, ictimaiyyətlə əlaqələrin qurulması, müxtəlif layihələrin icra edilməsi, eləcə də Korporativ Sosial Məsuliyyət işinə töhfə vermək üçün birgə fəaliyyətlərin təşkili məqsədilə razılığa gəliblər.

Azərbaycan Respublikasının Qida Təhlükəsizliyi Agentliyinin sədri Qoşqar Təhməzli çıxışında qida təhlükəsizliyi sahəsində innovativ layihələrin icrasının vacibliyini vurğulayıb.

Agentliyin sədri diqqətə çatdırıb ki, rəhbərlik etdiyi qurum Prezident İlham Əliyevin “Azərbaycan Respublikasında qida təhlükəsizliyi sisteminin təkmilləşdirilməsi ilə bağlı əlavə tədbirlər haqqında” 2017-ci il 10 fevral tarixli Fərmanına əsasən yaradılıb və bu ilin yanvarından fəaliyyətə başlayıb.

Q.Təhməzli bildirib ki, ən vacib məqamlardan biri qida təhlükəsizliyi zəncirində iştirak edən subyektlərin özlərinin qida təhlükəsizliyi haqqında məlumatlandırılması, eyni zamanda ictimaiyyətin maarifləndirilməsidir. Bu məsələ həm də yaxın zamanda qida təhlükəsizliyi anlayışının formalaşmasını və hər bir Azərbaycan vətəndaşının sağlamlığına ictimai nəzarəti təmin edəcək.

Onun sözlərinə görə, bu aktual problemin həllində media çox aktiv rol oynayır. Çünki ictimaiyyətə düzgün və dolğun məlumatların çatdırılması və maarifləndirilmə işlərinin aparılması sahəsində medianın rolu danılmazdır. Bunun üçün hər bir vətəndaş da bu sahədə fəal olmalıdır.

Q.Təhməzli Bakı Media Mərkəzi ilə qurulacaq əməkdaşlığı yüksək qiymətləndirib. O qeyd edib ki, qurumun həyata keçirdiyi maarifləndirmə aksiyaları çərçivəsində vətəndaşlar qida məhsullarından daha şüurlu şəkildə istifadə edəcək.

“Bu məqsədlə biz media ilə işi Bakı Media Mərkəzinə həvalə etmək niyyətindəyik. Çünki, Bakı Media Mərkəzi bu sahəni bilən çox peşəkar qurumdur. Hesab edirəm ki, Bakı Media Mərkəzi bu işin öhdəsindən peşəkarlıqla gələcək və ölkə əhalisinin sağlamlığının qorunmasında agentliyin qarşısında qoyulan vəzifələrin həyata keçirilməsində yardımçı olacaq. Məqsədimiz qalmaqal xarakterli, insanları çaşdıra biləcək məlumatlardan yayınmaqdır”.

Sonra Qida Təhlükəsizliyi Agentliyinin rəsmi loqosunun təqdimatı olub.

Bakı Media Mərkəzinin direktoru Orman Əliyev isə bildirib ki, Qida Təhlükəsizliyi Agentliyinin loqosunda qida təhlükəsizliyinin əsas anlayışlarından olan qida zənciri və bərəkət rəmzi sayılan sünbülün elementlərindən istifadə olunub. O, həmçinin bildirib ki, agentliyin fəaliyyəti ilə bağlı müxtəlif reklam aksiyaları və videoçarxlar hazırlanacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.