Xırdalan, 5 mart, Ətrabə Rzayeva, AZƏRTAC

Azərbaycanda innovasiya ekosisteminin formalaşmasında, o cümlədən startapların inkişafında xüsusi rol oynayan Bakı Mühəndislik Universiteti (BMU) bu sahədə BP şirkəti ilə əməkdaşlığa başlayır. Universitetin təşkilatçılığı və BP-nin maliyyə dəstəyi ilə "Yeni Fikir VI" startap müsabiqəsinə start verilib. Bu məqsədlə BMU-da geniş tərkibli görüş keçirilib.

AZƏRTAC xəbər verir ki, hər iki tərəfin nümayəndələrinin qatıldığı tədbirdə Təhsil Nazirliyi, Nəqliyyat, Rabitə və Yüksək Texnologiyalar Nazirliyinin Yüksək Texnologiyalar Parkı, ASAN İnnovasiyalar Mərkəzi, İNNOLAND İnkubasiya və İnnovasiya Mərkəzinin nümayəndələri də iştirak edib.

Tədbir iştirakçılarını salamlayan universitetin rektoru, professor Havar Məmmədov Ulu Öndərin siyasətinin layiqli davamçısı Prezident İlham Əliyevin bu sahəyə diqqətindən və ölkəmizdə yaradılan şəraitdən danışıb. Bildirilib ki, dünyada texnologiyanın sürətlə inkişaf etməsi ilə bağlı BMU müasir tələblərə uyğun fəaliyyət və inkişaf istiqaməti seçib. Məhz buna görə də universitetin hazırladığı kadrlar müasir texnologiyalardan istifadə etməyi və öz ideyalarını biznesə çevirməyi bacarmalıdırlar.

Qeyd edilib ki, BMU-da sənaye müəssisələri üçün mühəndislik və iqtisadiyyat ixtisasları üzrə müasir nəzəri bilikli, qabaqcıl müəssisələrdə təcrübə keçən və müsbət vətəndaş xüsusiyyətlərinə malik kadr hazırlığı həyata keçirilir və universitetin gələcəkdə sahibkarlıq universitetinə çevrilməsi yönündə mühüm işlər görülür. "Yeni Fikir" startap müsabiqəsi (YFM) də innovativ sahibkarlığın inkişafını dəstəkləyən layihədir. BP-nin də layihədə tərəfdaşlığı müsabiqəyə marağın daha da artacağına və yüksək səviyyədə təşkil olunacağına səbəb olacaq.

“BP Azerbaijan”ın əlaqələr, xarici işlər və strategiya üzrə vitse-prezidenti Bəxtiyar Aslanbəyli çıxış edərək BP-nin Azərbaycanda təhsil sahəsində, innovativ texnosahibkarlıq konsepsiyalarının, layihələrin və startapların dəstəklənməsi istiqamətində gördüyü işlərdən danışıb.

Bildirilib ki, Azərbaycanda BP-nin həyata keçirdiyi təhsil layihələrinin əsas məqsədlərindən biri ölkənin gələcəyi üçün güclü intellektual kapitalın yaradılmasına yardım etməkdir.

B.Aslanbəyli "Yeni Fikir VI" startap müsabiqəsi ölkənin ekosisteminin güclənməsi üçün texnologiyaya və innovasiyaya meyilli çox sayda insanın birgə işləməsi və öz intellektual bacarıqlarını və ambisiyalarını birləşdirməsi üçün böyük imkanlar yaradacağına inamını ifadə edib.

Sonra müsabiqənin layihə rəhbəri BMU Texnoparkının müdiri, dosent İsa Qasımov müsabiqə haqqında ətraflı məlumat verib. Qeyd edib ki, BP-nin maliyyə dəstəyi ilə keçiriləcək "Yeni Fikir VI" startap müsabiqəsi əvvəlki müsabiqələrdən fərqli olaraq həm də ekosistemə yeni startapların daxil olmasını hədəfləyir. O, layihənin 7 ay müddətində bir neçə mərhələdən ibarət olacağını söyləyib. Bildirib ki, müsabiqəyə layihələrin qeydiyyatı mayın 4-dək yenifikir. az veb səhifəsi vasitəsilə həyata keçiriləcəyini diqqətə çatdırıb.

Qeyd edilib ki, müsabiqə haqqında, həmçinin startapların əldə edəcəyi imkanlar haqqında ətraflı informasiya yenifikir.az veb səhifəsində verilib. Müsabiqə qalibləri maliyyə və inkibasiya xidmətləri şəklində dəstək ala biləcəklər.

Tədbirdə çıxış edənlər BMU ilə BP arasındakı əməkdaşlığı yüksək qiymətləndirib və birlikdə görüləcək işlərin faydalarından danışıblar.

Sonda tədbir iştirakçıları universitetin Texnoparkında fəaliyyət göstərən startapların fəaliyyəti, BP tərəfindən qurulmuş kimya mühəndisliyi və mexanika mühəndisliyi laboratoriyaları ilə tanış olublar. Qonaqlar həmçinin tələbələrin dərs prosesində laboratoriyalarda apardığı təcrübələri də yaxından izləyiblər.