MƏDƏNİYYƏT
Bakı Musiqi Akademiyasında LOLA audiovizual yayım sisteminin təqdimatı keçirilib
Bakı, 20 dekabr, AZƏRTAC
Dekabrın 20-də Ü. Hacıbəyli adına Bakı Musiqi Akademiyasında (BMA) LOLA (LoLa Low Latency Audiovisual Streaming System) audiovizual yayım sisteminin təqdimatı olub.
AZƏRTAC xəbər verir ki, təqdimat mərasimi Azərbaycan Milli Elmlər Akademiyasının (AMEA) İnformasiya Texnologiyaları İnstitutu, Bakı Musiqi Akademiyası və Avropa Elm və Təhsil Şəbəkələri Assosiasiyasının (GENAT) birgə təşkilatçılığı ilə reallaşıb.
Tədbirdə BMA-nın rektoru, Xalq artisti, professor Fərhad Bədəlbəyli çıxış edərək yeni sistem haqqında məlumat verib. Bildirib ki, bu sistem real zamanda musiqi nümayişlərini təmin etmək məqsədi daşıyır və fiziki olaraq bir-birilərindən uzaq məsafədə olan ifaçı və musiqiçiləri qabaqcıl şəbəkə xidmətləri vasitəsilə onlayn bağlantı ilə bir araya gətirir. Vurğulayıb ki, bu texnologiya müxtəlif coğrafi ərazilərdə yerləşən tədbirlərdə (konsertlər, ustad dərsləri, tədris və s.) iştirakı zəruri olan ifaçı və musiqiçilərin böyük zaman itkisinə səbəb olan səyahətlərinin onların həmin tədbirlərə onlayn bağlantı vasitəsilə qoşularaq əvəzlənməsinə xidmət edir.
Qeyd edilib ki, bu sistem Avropa İttifaqının tərəfdaş ölkələrini birləşdirən “EaPConnect” (Eastern Partnership Connect) layihəsi çərçivəsində reallaşıb.
Belə bir sistemin ölkəmizdə ilk ali təhsil ocağı Bakı Musiqi Akademiyasında tətbiq edildiyini deyən Azərbaycan Respublikası Təhsil nazirinin müavini Firudin Qurbanov texnologiyanın əhəmiyyətini vurğulayıb: “Bu sistemin özəlliyi ondadır ki, burada həm musiqi var, həm də müasir texnologiya. Hər ikisi müasir dünyanın önəmli sahələridir. Bu iki sahənin sintezi nəticəsində tamaşaçılara məsafədən asılı olmayaraq müxtəlif toplantılar, konsertlər və ustad dərsləri çatdırılacaq. Bu sistem vasitəsilə ustad dərslərin öyrənilməsi də əhəmiyyət kəsb edir. Biz bu gün distant təhsildə kifayət qədər təcrübə əldə etmişik. Bu təcrübələri tələbə və müəllimlərlə bölüşürük. Təhsil Nazirliyi ilk gündən bu layihəni dəstəkləyib. Birinci layihə Estoniya ilə reallaşıb. İnanıram ki, bu istiqamətdə başqa ölkələrlə də səmərəli əməkdaşlıq olacaq”.
Nazi müavini əlavə edib ki, layihə Azərbaycanın elm və təhsil müəssisələri tərəfindən uğurlu istifadəsinin təmin edilməsi, ölkənin ali təhsil müəssisələrinin Avropanın elm və təhsil qurumları ilə əməkdaşlıq əlaqələrinin gücləndirilməsi, habelə ölkəmizdə elm və təhsilin inteqrasiyasının təmin olunması istiqamətində uğurlu addımdır.
AMEA-nın vitse-prezidenti, İnformasiya Texnologiyaları İnstitutunun direktoru, akademik Rasim Əliquliyev sözügedən layihənin ölkəmizdə tətbiqi istiqamətində işlərə 2015-ci ildən başlanıldığını bildirib. Akademik söyləyib ki, Prezident İlham Əliyevin uzaqgörən siyasəti nəticəsində Azərbaycan “Şərq tərəfdaşlığı” təşəbbüsünə qoşulandan sonra Azərbaycan elm və təhsil sisteminin Avropa elm və təhsil sisteminə qoşulması üçün bir çox addımlar atılıb: “Son beş il ərzində Təhsil, Rabitə, Nəqliyyat və Yüksək Texnologiya nazirlikləri, eləcə də AMEA dövlət başçısının qeyd edilən istiqamətdə apardığı siyasətinə dəstək olaraq çox uğurlu işlər həyata keçiriblər. Beş il bundan əvvəl Azərbaycanda LOLA haqqında danışmaq qeyri-mümkün idi. Bizə yüksək keyfiyyətlərə malik texnoloji infrastruktur və texnoloji mühit lazım idi. Bu işin reallaşması üçün texnoloji imkanlarımızı artırdıq, yüksək xidmətlərdən istifadə etdik. Hazırda ölkəmizin 18 universiteti nail olduğumuz yüksək texnoloji xidmətlərdən istifadə edir. Bu gün ölkə universitetləri və institutlar Avropa təhsil təhsil ocaqları ilə eyni imkanlara malikdir. Deyə bilərik ki, artıq Avropa Bakıdadır”.
Layihənin önəmini qeyd edən R.Əliquliyev deyib ki, bu sistem Azərbaycanın intellektual musiqi və mədəniyyətini virtual məkan vasitəsilə təbliğ etməyə geniş imkan yaradacaq.
Sonra LOLA sisteminin təqdimatı olub. Tədbir konsert proqramı ilə davam edib.
Tədbirin önəmli məqamlarından biri də ilk dəfə olaraq kannel (Estoniya milli musiqi aləti) və tar (Azərbaycan milli musiqi aləti) üçün yazılmış “Mistik” əsərinin dünya premyerasının baş tutması idi. Musiqisi BMA-nın doktorantı, bəstəkar İlahə (İsrafilova) Qismətə aid əsər Estoniyalı kannel ifaçısı Kristi Mühling və beynəlxalq müsabiqələr laureatı, tar ifaçısı İbrahim Babayevin ifasında səslənərək təqdim olunub. Fərqli tembrlərə malik iki ölkə alətinin “Mistik” əsərlə bir araya gətirilməsi təklifi Estoniya Musiqi və Teatr Akademiyasının bəstəkarlıq bölməsinin müdiri Paolo Girol tərəfindən irəli sürülüb. Azərbaycanlı bəstəkar tərəfindən peşəkarlıqla ərsəyə gətirilən əsər tamaşaçılar tərəfindən maraqla qarşılanıb.