İQTİSADİYYAT


Bakı Nəqliyyat Agentliyi İSO beynəlxalq sertifikatlarına layiq görülüb

Bakı, 9 yanvar, AZƏRTAC

Bakı Nəqliyyat Agentliyi (BNA) İSO idarəetmə standartı üzrə iki beynəlxalq sertifikat alıb.

BNA-dan AZƏRTAC-a bildirilib ki, bu məqsədlə agentlikdə Almaniyanın Beynəlxalq İSO Standartları üzrə “Tüv Thüringen” Standartlaşdıma Orqanı tərəfindən beynəlxalq İSO 9001:2015 (keyfiyyətin idarə olunması) və İSO 14001:2015 (ətraf mühitin idarəetmə) standartının tələblərinə uyğunluq auditi keçirilib. Nəticədə Bakı Nəqliyyat Agentliyi İSO 9001:2015 və İSO 14001:2015 uyğunluq sertifikatlarına layiq görülüb.

İSO 9001:2015 standartı vətəndaşyönümlü, idarəetməyə sistemli yanaşma, təşkilat daxilində hər kəsin iştirakı, daimi təkmilləşdirmə, faktlara əsaslanan qərarların qəbul edilməsi kimi prinsiplərə əsaslanır. Keyfiyyətli idarəetmə sisteminin tətbiqi şəhər nəqliyyat sistemində baş verən hər bir prosesin şəffaf mexanizmlərə və qaydalara əsaslanmaqla həyata keçirilməsinin göstəricisidir. Hər bir prosesin başlanğıcı və sonu arasındakı fəaliyyət tam aydındır və tətbiq olunan şəffaf mexanizmə uyğundur.

Agentliyin fəaliyyətinin İSO 9001:2015 standartına uyğun qurulması işin keyfiyyət əmsalının ölçülməsini təmin edəcək və keyfiyyətin daim yüksəldilməsinə zəmin yaradacaq.

İSO 14001:2015 standartı şəhər nəqliyyatının ekoloji təsirlərinin müəyyənləşdirilməsi, bu təsirlərin ölçülərinin qiymətləndirilməsi və daha sonra bu təsirlərin minimuma endirilməsi məsələsində köməklik göstərən bir vasitədir. Adıçəkilən beynəlxalq sertifikatın əldə olunması ətraf mühitin mühafizəsi və bu sahələrdə görülən işlərin daha da mükəməlləşdirməsinə təkan verəcək.

Müasir dövrün əsas çağırışlarından olan ekoloji təhlükəsizlik və ətraf mühitin qorunması Bakı Nəqliyyat Agentliyi əsas hədəflərindəndir. Ekoloji baxımından daha təmiz nəqliyyat mühitinin formalaşdırılması üçün son illər sistemli tədbirlər həyata keçirilir. Qanunsuz parklanmaya qarşı mübarizə, yolların avtomobil buraxıcılıq qabiliyyətinin artırılmasına yönəlik layihələr belə tədbirlərdəndir. Eyni zamanda, insanların ictimai nəqliyyatdan istifadəyə marağını artırmaq üçün zəruri infrastruktur yaradılır və avtobus parkı yenilənir. Avtobus parkının yenilənməsi zamanı sıxılmış təbii qaz (CNG) və elektrik mühərrikli nəqliyyat vasitələrinin olması əsas şərt olaraq müəyyən edilib. Qısa vaxtda şəhər nəqliyyatında CNG mühərrikli avtobusların sayı 600 ədədə çatdırılıb.

Qeyd edək ki, Bakı Nəqliyyat Agentliyinin fəaliyyət sahəsinə uyğun olaraq, gələcəkdə digər beynəlxalq standartların da tətbiqi nəzərdə tutulur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.