Bakı, 11 sentyabr, Elvin Camalov, AZƏRTAC

Bakı Nəqliyyat Agentliyinin (BNA) yeni “alo141.az” internet portalı istifadəyə verilib.

AZƏRTAC xəbər verir ki, hazırda portalda 6 əsas bölmə işlənib hazırlanıb. Gələcəkdə istifadəçilərin də fikirləri və təklifləri nəzərə alınmaqla, digər faydalı bölmələrin də istifadəyə verilməsi nəzərdə tutulur.

Bakı Nəqliyyat Agentliyinin aparat rəhbəri Fərid Nuriyev bildirib ki, BNA nəqliyyat xidmətlərinin təkmilləşdirilməsi istiqamətində görülən işlərin səmərəliliyini daha da artırmaq məqsədilə İKT-nin imkanlarından geniş istifadə edir. Vətəndaşlarımızdan daxil olan müraciətlərin obyektiv araşdırılması və cavablandırılması, fəaliyyətin təkmilləşdirilməsi üçün təhlillərin aparılması və vətəndaş məmnunluğunun təmin edilməsi məqsədilə agentliyin “ALO141 Çağrı Mərkəzi”nin fəaliyyəti ən son texnoloji yeniliklər nəzərə alınmaqla yenidən qurulur. “alo141.az” internet portalı da bu çərçivədə reallaşdırılan mühüm işlərdən biridir.

Onun sözlərinə görə, “alo141.az” multifunksional bir portal olaraq, istifadəçilərə Bakı şəhərinin ictimai nəqliyyatından istifadə, eyni zamanda, digər əhəmiyyətli məlumatları təqdim edir. Sayt 3 dildə - Azərbaycan, rus və ingilis dillərində istifadəyə verilir. Əsas menyuda BNA-nın “ALO141 Çağrı Mərkəzi” haqqında ümumi məlumatla, paytaxtın ictimai nəqliyyat sistemində ən son xəbərlərlə və ən çox soruşulan sualların cavabları ilə tanış olmaq mümkündür.

Bakı Nəqliyyat Agentliyinin ictimaiyyətlə əlaqələr şöbəsinin baş məsləhətçisi Rəvanə Əliyeva yeni internet portalı və portalda olan bölmələr barəsində məlumat verib.

O bildirib ki, saytda ilk bölmə “Şikayət və təkliflər” bölməsidir. Vətəndaşlar agentliyin “bna.az” rəsmi internet səhifəsindən birbaşa və ya elektron poçt ünvanına məktub göndərməklə, eyni zamanda, “facebook” sosial şəbəkəsində BNA-nın rəsmi səhifəsinin ismarıc bölməsi və şərhlər vasitəsilə müraciət edə bilirlər. Bundan əlavə, “ALO141 Çağrı Mərkəzinə” telefon vasitəsilə olan müraciətlərlə yanaşı, portalda məhz “Şikayət və təkliflər” bölməsi ilə istifadəçilər BNA-nə rəsmi müraciət edə biləcəklər. Bu bölmədə ictimai nəqliyyat ilə bağlı hər növ təklif və ya şikayətləri günün istənilən saatında ad, soyad, telefon nömrəsi və müraciətin aid olduğu kateqoriyanı seçməklə ünvanlaya bilərlər.

R.Əliyevanın sözlərinə görə, ikinci bölmə, “Necə getməli?” (GEDİŞ PLANI) adlanır. Bu bölmədə, istifadəçilərə səfərlərini əvvəlcədən planlaşdırmaq üçün iki sadə üsul təqdim edilir. Birinci üsul hal-hazırda olduğu ünvanı və gedəcəyi ünvanı qeyd etməklə, ikinci üsul isə A və B nöqtələrini “maus”un sol düyməsi ilə hal-hazırda olduğu və gedəcəyi ünvanın üzərinə daşıyaraq həyata keçirilir. Burada, hansı məsafəni piyada, hansı avtobusla və ya metronun yaşıl və ya qırmızı xətti ilə gediləcəyi, dayanacaqların sayı, ictimai nəqliyyatda istifadə olunacaq zaman, eyni zamanda, istifadəçinin şəxsi minik avtomobili ilə necə getməli olduğu və sərf edəcəyi zaman göstərilir. Üçüncü bölmə, “Taksi” bölməsidir. Bu bölmədə, hazırda Bakı şəhərində sifarişli taksi xidməti ilə məşğul olan şirkətlər barədə məlumat almaq mümkündür.

“Növbəti - dördüncü bölmə “Avtobuslar” bölməsidir ki, burada, istənilən marşrutun nömrəsini seçməklə, xəritədə həmin marşrutun getdiyi yolu, əsas dayanacaqları və xəttin uzunluğunu görmək olar. Bütün bölmələrdə olduğu kimi, burada da xəritə və peykdən görünüş mümkündür. Beşinci bölmə “Nəqliyyat Mübadilə Mərkəzləri” adlanır. Bu bölmədə hal-hazırda fəaliyyət göstərən mərkəzlər barədə məlumat, həmin mərkəzlərə daxil olan və çıxan marşrutların siyahısı və son dayanacağı haqqında məlumat almaq mümkündür. Eyni zamanda, Mərkəzdə olan marşrutun üzərinə klikləməklə, “Avtobuslar” bölməsinə keçid etmək olar. Sonuncu bölmə, “Yollarda vəziyyət” bölməsidir. Bu bölmədə paytaxt yollarındakı tıxaclar barədə məlumat əldə etmək mümkündür. Bölmənin metrikası “Google” üzərində yığılıb”, - deyə R.Əliyeva vurğulayıb.