Bakı, 6 noyabr, AZƏRTAC 

Noyabrın 6-da Çex Respublikasının təhsil, gənclər və idman nazirinin müavini xanım Dana Prudnikova, nazirliyin beynəlxalq əlaqələr şöbəsinin rəhbəri Ladislav Banovets, bu ölkənin Azərbaycandakı səfiri Milan Ekert, səfirin müavini Daniel Putik Bakı Slavyan Universitetində (BSU) olublar.

BSU-dan AZƏRTAC-a bildiriblər ki, rektor professor Nurlana Əliyeva qonaqlara universitetin yaranma tarixi, keçdiyi inkişaf yolu, beynəlxalq əlaqələri və tədris prosesi barədə ətraflı məlumat verib.

N.Əliyeva, həmçinin Azərbaycan Respublikası ilə Çexiya arasında bütün zamanlarda sıx dostluq əlaqələrinin olduğunu bildirib. Bu münasibətlərin çoxtərəfli olduğunu, elm, təhsil, mədəniyyət və digər sahələri əhatə etdiyini vurğulayıb. O, Azərbaycanın multikultural bir dövlət olduğunu, bütün xalqlara və mədəniyyətlərə burada böyük hörmət və ehtiramla yanaşıldığını diqqətə çatdırıb.

Rektor deyib ki, bu günlərdə ölkəmizdə keçirilən VI Bakı Beynəlxalq Humanitar Forumu Azərbaycanın müasir demokratik və multikultural dəyərlərə sadiq qaldığını bir daha nümayiş etdirir. O, bu prinsiplərin bünövrəsinin ümummilli lider Heydər Əliyev tərəfindən qoyulduğunu və Prezident İlham Əliyev, Birinci vitse-prezident Mehriban Əliyeva tərəfindən uğurla davam etdirildiyini söyləyib.

Rektor BSU-nun Çex Respublikasının bir sıra universitetləri ilə sıx əlaqələrinin olduğunu bildirib. O, Praqada yerləşən Karlov Universitetində Azərbaycan Mərkəzinin fəaliyyət göstərdiyini qeyd edib. Bildirilib ki, Ostrava Universiteti ilə BSU-nun çoxillik əlaqələri mövcuddur.

N.Əliyeva BSU-da fəaliyyət göstərən Çexiya Mərkəzində bu ölkənin tarixinə, ədəbiyyatına, mədəniyyətinə, etnoqrafiyasına aid materialların toplandığını və tədqiqatlar aparıldığını deyib. BSU ilə Ostrava Universiteti arasında tələbə-müəllim mübadiləsinin aparıldığı bildirilib. Çex Respublikasının digər universitetlərində də Azərbaycan Mərkəzinin açılmasının vacibliyi vurğulanıb və bunun ölkələrarası münasibətlərdə müsbət rol oynayacağına əminlik ifadə olunub.

Dana Prudnikova görüşə görə universitetin rəhbərliyinə minnətdarlığını bildirib və gələcəkdə əlaqələrin daha da genişlənəcəyinə ümidvar olduğunu deyib. O, Azərbaycanın regionun sürətlə inkişaf edən ölkəsi olduğunu, Bakının dünyanın inkişaf etmiş şəhərləri sırasında dayandığını bildirib. Qonaq Çex dilinin dünyada yayılmasında maraqlı olduğunu qeyd etməklə bərabər, Azərbaycan dilinin də ölkəsindəki universitetlərdə öyrənilməsinə dəstək verəcəyini vurğulayıb.

Sonra nümayəndə heyəti BSU-da fəaliyyət göstərən Çexiya Mərkəzi ilə tanış olublar. Professor Elçin Mehrəliyev, mərkəzin müdiri Qəmbər Qəmbərov burada görülən işlər barədə qonaqlara məlumat veriblər.