Bakı, 4 may, AZƏRTAC 

Mayın 4-də Bakı Slavyan Universitetində (BSU) Ümummilli lider Heydər Əliyevin anadan olmasının 95-ci ildönümünə həsr edilən “Azərbaycanşünaslığın aktual problemləri” mövzusunda IX beynəlxalq elmi konfransın bağlanış mərasimi keçirilib.

Universitetdən AZƏRTAC-a bildiriblər ki, konfrans çərçivəsində BSU ilə Türkiyənin Reytinq Akademiyası arasında əməkdaşlığa dair müqavilə imzalanıb. Müqaviləyə əsasən, Türkiyə, Ukrayna və Makedoniyanın universitetlərində birgə elmi konfranslar keçiriləcək.

Tədbirdə BSU-nun rektoru, professor Nurlana Əliyeva beynəlxalq elmi konfrans barədə fikirlərini bölüşərək deyib: “Biz çox şadıq ki, Ümummilli Liderə həsr olunan bu konfrans daha geniş miqyasda, beynəlxalq səviyyədə təşkil olundu, elmə öz töhfəsini verdi. Tədbirə dünyanın 14 ölkəsindən 310 alim qatıldı. İştirakçıların məqalələri beynəlxalq konfrans üçün dərc olunan topluda əksini tapıb”.

Universitetin elmi işlər üzrə prorektoru, professor Rafiq Novruzov ikigünlük konfrans çərçivəsində keçirilən mühüm tədbirlər barədə məlumat verib. Bildirilib ki, konfrans çərçivəsində Belarus Dövlət Pedaqoji Universiteti (BDPU) ilə BSU arasında telekörpü yaradılıb. Telekörpü vasitəsilə konfransın bir hissəsi BDPU-nun nəzdindəki Azərbaycan Dili və Mədəniyyəti Mərkəzində keçirilib. Telekörpüyə ölkəmizin Belarusdakı səfirliyinin nümayəndələri, BDPU-nun rektoru Aleksandr Juk və universitetin kollektivi qatılıb. Azərbaycan tərəfdən isə BSU-nun müəllimləri ilə bərabər, Belarusdakı Azərbaycan diasporunun rəhbəri Natiq Bağırov də iştirak edib.

Tədbirdə konfransın bölmə iclaslarına rəhbərlik edən xarici və yerli alimlərin hesabatları dinlənilib. Azərbaycanda olmaqdan məmnunluqlarını ifadə edən qonaqlar konfransın işini yüksək dəyərləndirib, təşkilatçılara, universitetin rektoru, professor Nurlana Əliyevaya minnətdarlıqlarını bildiriblər.

Sonda BSU-nun musiqi-rəqs ansamblı çıxış edib.