İQTİSADİYYAT
Bakı metrosunda Xalq Cümhuriyyətinin 100 illiyinə həsr olunan aksiya keçirilib VİDEO
Bakı, 16 aprel, Elvin Camalov, AZƏRTAC
Bakı metrosunda Xalq Cümhuriyyətinin 100 illiyinə həsr olunan aksiya keçirilib.
AZƏRTAC xəbər verir ki, bu barədə “Bakı Metropoliteni” QSC-nin mətbuat xidmətindən məlumat verilib.
Bildirilib ki, Bakı metropolitenində növbəti sosialyönümlü aksiya keçirilib. Budəfəki tədbirin mövzusu Azərbaycan Xalq Cümhuriyyətinin 100 illiyi olub. Xalq Cümhuriyyətinin yubileyinə “Bakı Metropoliteni” QSC-də də maraqlı və özünəməxsus töhfə hazırlanıb. Belə ki, “qırmızı” xətdə hərəkət edən sərnişin qatarında fləşmob keçirilib. Fləşmobda ümummilli lider Heydər Əliyevin dilindən Səməd Vurğunun məşhur “Azərbaycan” şeirinin bir bəndi səsləndirilib. Daha sonra fləşmob iştirakçıları həmin şeirdən bir neçə bənd ifa ediblər.
Fləşmob Ulu Öndərin “...Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamının qatarda səsləndirilməsi ilə yekunlaşaraq, sərnişinlərin alqışına səbəb olub.
Qeyd edək ki, Azərbaycan Respublikasının Prezidenti İlham Əliyevin 2017-ci il mayın 16-da imzaladığı sərəncama əsasən, Cümhuriyyətin yubileyi geniş qeyd edilir. Həmçinin dövlət başçısının bu il yanvarın 10-da imzaladığı digər sərəncamla 2018-ci il Azərbaycan Respublikasında “Azərbaycan Xalq Cümhuriyyəti İli” elan edilib. Bununla əlaqədar ölkə daxilində, eləcə də bütün dünyada müxtəlif mövzularda tədbirlər keçirilir.