İDMAN


Bakı yunan-Roma güləşi üzrə dünya kuboku yarışına ev sahibliyi edəcək

Bakı, 21 yanvar, AZƏRTAC

Dünya Güləş Birliyinin (UWW) İcraiyyə Komitəsinin onlayn iclası keçirilib.

AZƏRTAC Azərbaycan Güləş Federasiyasına istinadla xəbər verir ki, UWW-nin Büro Üzvü, federasiyanın vitse-prezidenti Namiq Əliyevin də qatıldığı vebinarda bir sıra yarışlarla bağlı önəmli qərarlar verilib. Daha öncə təqvimdə ilin ilk reytinq turniri kimi nəzərdə tutulmuş “Matteo Pellikone” yarışı İtaliyada “omikron” virusunun geniş yayılması üzündən təxirə salınıb. Belə ki, İtaliya hökumətinin məlum səbəbdən tətbiq etdiyi sərt məhdudiyyətlər UWW-ni bu addımı atmağa vadar edib. Romadakı yarış iyunun 22-25-də keçiriləcək. Belə olan halda ilk reytinq yarışı fevralın 24-dən 27-dək İstanbulda təşkil olunacaq ənənəvi xatirə turniri olacaq. İkinci reytinq yarışı Qazaxıstanda (2-5 iyun), mövsümün son reytinq turniri isə Tunisdə (14-17) baş tutacaq.

UWW-nin prezidenti Nenad Laloviç məsələ ilə bağlı bunları deyib: “İnanırıq ki, bu dəyişikliklər hər il keçirilən reytinq yarışlarına fayda verəcək. Bu turnirlərdə güləşçilərə xallar veriləcək. İlin sonunda toplanan xallara əsasən ən yaxşı güləşçilər müəyyənləşəcək”.

Tədbirdə ilin sonunda keçiriləcək dünya kuboku yarışının məkanları da müəyyənləşib. Sərbəst və qadın güləşi üzrə dünya kuboku yarışı 2022-2023-cü illərdə İovada (ABŞ) təşkil olunacaq. Yunan-Roma güləşi üzrə analoji yarış isə ölkəmizə həvalə olunub. Bu il noyabrın 5-6-da keçiriləcək yarışa Bakı ev sahibliyi edəcək. Əvvəlki illərdən fərqli olaraq bu dəfə turnirdə 8 yox, 6 komandanın iştirakı nəzərdə tutulub. Belə ki, ötən il Norveçdə keçirilən dünya çempionatında komanda hesabında ilk beşlikdə yer alan Rusiya, İran, Azərbaycan, Gürcüstan və Türkiyə ilə yanaşı, dünya yığması (All Star) kubok uğrunda mübarizə aparacaq. Yunan-Roma güləşi üzrə dünya kuboku yarışı 5 illik fasilədən sonra keçiriləcək. Klassik güləş üzrə millimiz 1 dəfə kuboku başı üzərinə qaldırıb. Komandamız 2015-də Tehranda kubokun sahibi olub.

Qeyd edək ki, daha sonra ölkəmizdə iki dəfə (2004-cü, 2012-cü) sərbəst güləş üzrə dünya kuboku yarışı keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.