İQTİSADİYYAT


Bakıda 4-cü dəfə “B2B Luxury & MICE Workshop” keçirilib VİDEO

Bakı, 14 aprel, AZƏRTAC

Aprelin 14-də “Fairmont Baku” mehmanxanasında Böyük Britaniyanın “TMİ Consultancy” şirkəti və yerli azərbaycanlı mütəxəssisləri ilə birgə Mədəniyyət və Turizm Nazirliyinin dəstəyi ilə turizm biznesinin professionalları üçün “B2B Luxury & MICE Workshop” işgüzar görüşü keçirilib.

AZƏRTAC xəbər verir ki, budəfəki “B2B Luxury & MICE Workshop”un sponsorları İspaniyanın “Costa del Sol” turizm təşkilatı və İsveçrənin turizm ofisidir.

Tədbirdə Azərbaycanın qabaqcıl turizm şirkətləri, beynəlxalq otellər şəbəkələrinin, bir sıra xarici dövlətlərin turizm ofisləri və turoperatorların nümayəndələri iştirak ediblər.

Mədəniyyət və Turizm Nazirliyinin əməkdaşı Bəxtiyar Qılıcov tədbir barədə məlumat verərək bildirib ki, sayca dördüncü dəfə reallaşan görüş ölkəmizdə turizm infrastrukturunun mövcud standartlara uyğunlaşdırılması, eyni zamanda xarici turizm şirkətlərinin Azərbaycan turizm bazarına marağının artırılması, ölkəmizə xarici turistləri cəlb edilməsi məqsədilə təşkil olunub. Nəzərə çatdırıb ki, görüşdə iştirak edən xarici nümayəndələrin sayı iki dəfə artaraq 40-a çatıb. Onlar bu tədbirdə təmsil etdikləri turizm şirkətlərinin imkanlarını təqdim edəcəklər. Bu isə onu göstərir ki, Azərbaycan turizm bazarına xarici ölkələrdə maraq getdikcə artır.

Nazirliyin əməkdaşı qeyd edib ki, bu işgüzar görüşün keçirilməsi yerli vətəndaşlarımıza xarici lüks otellərdə münasib qiymətlərə istirahət etməyə imkan yaradacaq. Belə bir tədbirin Bakıda keçirilməsinin yerli turizm şirkətləri üçün böyük əhəmiyyət kəsb etdiyini vurğulayan B.Qılıcov bildirib ki, bu eyni zamanda ikitərəfli əlaqələrin də genişlənməsi və Azərbaycan turizm biznesinin inkişafına gətirib çıxaracaqdır.

İşgüzar görüşdə “Azərbaycanın səyahət turizm bazarına ümumi baxış”, “Onlayn səyahətin inkişafı və istiqamətləri”, İspaniyanın “Costa del Sol” turizm təşkilatının təqdimatları olub.

Qeyd edək ki, İsveçrədən bu tədbirdə 14 turizm şirkəti, hotellər və tibbi mərkəzlər iştirak edib.

İspaniya da bu tədbirdə geniş nümayəndə heyəti ilə təmsil olunub. Bunun da başlıca səbəbi 2015-ci ilin yay turizm mövsümündə Bakı-Barselona birbaşa reysinin açılmasıdır. Tədbirdə bu ölkənin turizm təşkilatları, Kataloniya, Kosta del Sol, və Barselona bölgələrinin turizm şirkətləri iştirak ediblər. Bu şirkətlər arasında İspaniyanın ən böyük turoperatoru olan “Terramar Group i Viajes Ancodes”, Madridin ən yaxşı hoteli “Villa Magna” və tanınmış ticarət mərkəzi olan “El Corte Ingles” də var.

Bundan başqa, builki “B2B Luxury & MICE Workshop”da “Relais & Chateaux” beynəlxalq hotellər şəbəkəsi, Özbəkistanın “Dolores Travel”, Monteneqronun yeni 5 ulduzlu “Regent Porto Montenegro”, İtaliyanın “Boscolo Hotels” hotel qrupu və “Relais San Maurizio” hoteli də ilk dəfə olaraq təmsil olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.