Bakıda ASOSAI təşkilatının Dayanıqlı İnkişaf Məqsədləri üzrə İşçi Qrupunun illik toplantısı keçirilir

Bakı, 23 may, AZƏRTAC

Hesablama Palatası ASOSAI təşkilatının Dayanıqlı İnkişaf Məqsədləri üzrə İşçi Qrupunun illik toplantısına ev sahibliyi edir.

Mayın 23-də Bakıda Azərbaycan Respublikası Hesablama Palatasının ev sahibliyi ilə ASOSAI təşkilatının Dayanıqlı İnkişaf Məqsədləri (DİM) üzrə İşçi Qrupunun ilk fiziki toplantısı keçirilir.

AZƏRTAC xəbər verir ki, Hesablama Palatası da daxil olmaqla 11 Ali Audit Orqanın (AAO) iştirakı ilə keçirilən bu tədbir mayın 25-dək davam edəcək. Tədbir zamanı üzv AAO-ların DİM-lərə hazırlıq və DİM-lərin auditi sahəsində əldə etdikləri nailiyyətlərdən, həmçinin qabaqcıl təcrübələrdən bəhs ediləcəkdir.

Qeyd edək ki, 2022-ci ildə fəaliyyətə başlamış İşçi Qrupun əsas məqsədi növbəti on il ərzində (2030-cu ilə qədər) DİM-lər sahəsində müxtəlif AAO-lar arasında bilik və təcrübə mübadiləsi aparmaq, sözügedən sahəni həm regional, həm də beynəlxalq səviyyədə zənginləşdirməkdir.