İQTİSADİYYAT


Bakıda Ali Audit Qurumlarının Beynəlxalq Təşkilatının Dövlət Borcu üzrə İşçi Qrupunun toplantısı başa çatıb

Bakı, 24 may, AZƏRTAC

Hesablama Palatasının təşkilatçılığı ilə mayın 23-dən Bakıda keçirilən Ali Audit Qurumlarının Beynəlxalq Təşkilatının (INTOSAI) Dövlət Borcu üzrə İşçi Qrupunun (DBİQ) toplantısı başa çatıb.

AZƏRTAC xəbər verir ki, iki gün ərzində toplantıda Dövlət Borcu üzrə İşçi Qrupunun Katibliyinin hesabatları, 2020-2022-ci illər üçün İşçi Qrupunun iş planı, ötən ilin oktyabrında keçirilmiş sorğu nəticələrinin xülasəsi, Dövlət Borcu Auditinin məlumat bazası üzrə ekspertlər şəbəkəsinin çıxışları dinlənilib, 2017-2019-cu illər üzrə iş planı və veb-səhifəsinin müzakirəsinin iş planındakı tədbirlər üzrə tapşırıq qruplarının tərkibi müəyyən edilib.

Toplantının ikinci günü INTOSAI-ın İnkişaf Təşəbbüsünün (IDI) direktor müavini Arçana Şirsat tərəfindən "Dövlət borcu auditinin ISSAI 100-ə uyğun olaraq konsolidasiyası və uyğunlaşdırılması; INTOSAI-ın İnkişaf Təşəbbüsünün qlobal ictimai töhfələrinin keyfiyyətinə nəzarət üzrə protokol; INTOSAI-ın Peşəkar Bəyanatlar çərçivəsi ilə bağlı müvafiq prosedurlar və INTOSAI-ın Bilik Mübadiləsi Komitəsinin (BMK) İşçi Qrupunun layihələri üzrə protokol"u təqdim olunub.

Hindistan Ali Audit Qurumunun nümayəndəsi Caysankar Dandapani "BMK-IDI ictimai portal ilə bağlı yeni işlər: Bilik mübadiləsinin daha səmərəli platforma üçün INTOSAI ictimai portalın təkmilləşdirilməsi", Rusiya Ali Audit Qurumunun nümayəndəsi Tatyana Otroxova "Rusiya Federasiyasının dövlət borcunun strateji auditi", Gürcüstan Ali Audit Qurumunun nümayəndəsi Ana Mazmişvili "Maliyyə (Dövlət borcu) dayanıqlılığının qiymətləndirilməsində AAQ-ların rolu", Çin Ali Audit Qurumunun nümayəndəsi Vanq Banqvu "Milli dövlət borcunun auditində məlumat təhlilinin tətbiqi – Çinin yeni inkişafı", ABŞ Ali Audit Qurumunun nümayəndəsi Doun Simpson "Amerika Birləşmiş Ştatlarının maliyyə möhkəmliyi", Maldiv Ali Audit Qurumunun nümayəndələri Hüseyn Niyazi və Məqbul Xalid "Dövlət borcu dayanıqlılığına auditor yanaşması", Küveyt Ali Audit Qurumunun nümayəndələri Salma Əl-Essa Al-Qenae və Rim Həmid Əlsayif "Küveytdə dövlət borcunun INTOSAI standartları əsasında həyata keçirilməsində Dövlət Audit Bürosunun rolu", İordaniya Ali Audit Qurumunun nümayəndəsi Bilal Camal Əhməd Akaşeh "İordaniyada daxili borc xarici borca qarşı", Tailand Ali Audit Qurumunun nümayəndələri Pitikun Niltanom və Orapan Limriantonq "Dövlət fiskal və maliyyə nizamnaməsi 2018: Dövlət borcunun idarəedilməsində Tailand AAQ-ın rolu" mövzularında çıxış ediblər.

2020-2022-ci illər üzrə Dövlət Borcu üzrə İşçi Qrupunun iş planından irəli gələn tədbirlər üzrə Misir və Hindistan ali audit qurumlarına, eləcə də Şimali Makedoniya və Litva ali audit qurumlarına tapşırıqlar müəyyən edilib, İşçi Qrupunun Katibliyinin 2020-2022-ci illər üzrə DBİQ-in iş planının layihəsi müzakirə olunaraq təsdiqlənib, İşçi Qrupunun sədrinin DBİQ-in 2020-ci il və 2021-ci ildəki tədbirini keçirəcək ali audit qurumları müəyyənləşdirilib.

Toplantının sonunda Dövlət Borcu üzrə İşçi Qrupun sədrinin və Azərbaycan Respublikası Ali Audit Qurumu Təşkilat Komitəsinin yekun qeydləri və işgüzar inzibati bəyanatları dinlənilib. Həmçinin "Dövlət Borcunun idarə edilməsinin auditi", "Dövlət Borcunun İdarə edilməsi: Düzgün işlər və ya işlərin düzgün şəkildə həyata keçirilməsi", "Dövlət borcu auditinin ISSAI 100-ə uyğun olaraq konsolidasiyası və uyğunlaşdırılması", "Rusiya Federasiyasının dövlət borcunun strateji auditi", "Milli dövlət borcunun auditində məlumat təhlilinin tətbiqi – Çinin yeni inkişafı", "ABŞ-ın maliyyə möhkəmliyi" və sair mövzularda təqdimatlar olub.

Tədbirdə Azərbaycan Hesablama Palatası da daxil olmaqla 28 ölkənin Ali Audit Qurumunun nümayəndə heyəti iştirak edib.

Qeyd edək ki, 25 il ərzində INTOSAI Bilik Mübadiləsi Komitəsinin nəzdində fəaliyyət göstərən və 34 üzv Ali Audit Qurumundan ibarət olan İşçi Qrupa sədrliyi 2017-ci ildə Fillippin Audit Komissiyası öz üzərinə götürüb. INTOSAI-ın idarə heyətinin təsis etdiyi Dövlət Borcu üzrə İşçi Qrupun əsas məqsədi standartların təqdim edilməsi, qabaqcıl təcrübə mübadilələrinin təşkili, qarşılıqlı maraq və problemli məsələlərə dair tədqiqat aparmaq da daxil olmaqla bilik mübadiləsi vasitəsilə ali audit qurumlarının əməkdaşlığı və davamlı inkişafıdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.